Furgo Martxa abiatu dute ELAko erresidentzietako langileek
118 greba egun egin dituzte aurretik erresidentzietako ELAko langileek, eta hilaren 11tik abenduaren 11 arte greban dira berriz ere.
Furgo martxa gaur abiatu dute Errenteria-Oreretan ELAko erresidentzietako langileek. 118 greba egun egin dituzte aurretik erresidentzietako ELAko langileek, eta hilaren 11tik abenduaren 11 arte greban dira berriz ere. Gaur, beste iniziatiba jarri dute martxan: Furgo Martxa. Horren arabera erresidentzietako langileen lan gatazka sozializatzea dutela helburu azaldu dute. Errenteria-Oreretan abiatu dute iniziatiba hori gaur bertan.
Besteak beste, informazioa banatzen aritu dira azoka txikian eta ondoren manifestazioa egin dute Herriko Plazaraino. Bertan amaitu dute protesta.
Zaintzarena feminizatutako sektorea da, soldata arrakala eta lan baldintza prekarioak nagusitzen dira, eta zehazki lan baldintza horiek hobetzeko borrokan ari dira, beren egoera duintzeko eta horrekin batera erresidentzietan diren adinekoek ere zaintza duina izan dezaten. Zaintzan ari diren langileen %98 emakumeak dira.
Gaur Errenteria-Oreretan abiatu duten dinamika, Gipuzkoako beste herrietara eramango dute eta antolatzaileek jakinarazi dutenez, bihar Azpeitian izango dira.
