Nere Mujika eta herrietako kantu jirak, Oarsoarrak Sarien hartzaileak
Nere Mujika errenteriarra eta herrietako kantu jirak izango dira 2019ko Oarsoarrak Euskararen Sarien onuradun. Sari emate ekitaldia hilaren 29an da, Donibanen.
Nere Mujika. Oarsoaldeko Euskara Batzordeak erabaki du nori eman 2019ko Oarsoarrak Euskararen Sariak: Nere Mujika euskaltzale eta ekintzaile errenteriarrari, eta Errenteria-Oreretako, Lezoko, Pasai Donibaneko, Antxoko eta San Pedroko kantu jirei. Sari emate ekitaldia azaroaren 29an izango da, Donibaneko Juanba Berasategi aretoan, 19:00etatik aurrera. Ekitaldi irekia da, nahi duen oro joan daiteke.
Oarsoarrak Euskararen Sariak 2010etik ematen ditu Oarsoaldeko Euskara Batzordeak. Epaimahaia, eskualdeko euskalgintzako ordezkariek osatzen dute: Oarsoaldeko lau udalek, eta Errenteria-Oreretako Lau Haizetara Euskalzaleen Topaguneak, Oarsoaldeko AEK-k, Oarso Bidasoko Hitzak eta Oiartzungo Ttur-ttur euskaltzaleon bilguneak dute ordezkaritza bertan. Hala, epaimahaiak hobetsi du Mujikaren kasuan euskara bere bizitzaren ardatz izanik eman duen ereduagatik saritua izatea. Kantu jiren kasuan, euskara kalera ateratzeko egiten duten lana aitortu nahi izan du, eta jende askorentzat euskarara hurbiltzeko bide izateagatik.
Nere Mujika
Altza-Herreran jaioa baina aspaldi errenteriartua. Urte luzez irakaskuntzan jardun zuen. Frankismo garaia izan arren, euskara eta euskal kultura transmititzen zizkien ikasleei, dantza ardatz hartuta gehienetan. Nere Mujika euskaraz mamitutako bizitza baten eredu argia da. Alor askotan aritu den eta ari den arren, euskara du beti erdigune; emakume taldeen antolaketan, dantza ikastaroetan, kopla kantari, elkartasun ekintzetan, kantu jiran eta herrigintzan beti euskaraz eginez eredu bikaina ematen digu Nerek.
Kantu jirak
Kantuak, euskarazko kantuak asko eman dio herri honi eta oraindik ere asko ematen dio. Azken urteotan herriz herri zabaltzen ari diren kanturako taldeek poza ematen dute. Gure herria bizirik dela sentiarazten digute bazterrik bazter. Euskara kalera ateratzeko egiten duten lana azpimarragarria da. Herrietan euskal giroa zabaltzeaz gain, jende askorentzat euskarara hurbiltzeko, euskara ikasteko akuilu eta makulu bihurtu dira.
