Tona bat hondakin atera dute ibaietatik
1.000 kilogramo hondakin baino gehiago atera dituzte Oiartzun ibaiaren ubideetatik eta Tolarieta, Masti, Lintzirin eta Epentza ubideen erretenetatik.
Plastikoa atera dute batez ere ibaietatik. 1.000 kilogramo hondakin baino gehiago atera dituzte Oiartzun ibaiaren ubideetatik eta Tolarieta, Masti, Lintzirin eta Epentza ubideen erretenetatik. Errenteriako Udala eta Behemendi Landa Garapenerako elkartearen artean egindako akordioaren barruan, ekainean eta irailean brigada batek bi garbiketa kanpaina egin ditu, eta aurretik aipatutakoak dira emaitzak. Garbitutako hondakinen artetik, plastikoa izan da nagusia.
Oiartzun ibaiari dagokionean, Oiartzungo muga eta Santa Kalra plazaren arteko zatia garbitu du brigadak; Lintziringo erretena Lartzabal auzotik hasita Oiartzungo mugaraino hartzen duen zatia barne. Landa eremuan, Tolarieta, Masti eta Epentza ubideak garbitu dituzte: Tolarieta baserritik Masti-Loidi industrialdera bitarte; Loidi baserritik Pontika auzora; eta Perurenatik Txikierdira.
Garbiketa kanpainak hiritarrek hondakinen kudeaketak duen garrantziaz eta norberaren jokaeraren ardura kolektiboa nahiz indibidualaz sentsibilizatzea duela helburu azaldu dute arduradunek, “hondakinak jatorrian egoki bereizi eta birziklatzen ez baditugu, agian gure ibaietako ubideetan agertuko dira eta horiek kaltetu eta kutsatuko dituzte, baita hondakinak Kantauri itsasoraino iritsi ere”.
Hondakin horiek desegiten diren nurrian, ekosistemarako eta flora eta fauna basatietarako kaltegarriak diren konposatu kimikoak jaregin eta kutsadura fokuak sortzen dituztela nabarmendu dute, ubideetan eta hondoetan eraginez, “plastikoaren kasuan arrain eta hegaztiak bertan bildu daitezke, edo irentsi dezakete eta azkenean fauna desagerrarazi ere egin dezake”.
