Lezok jasoko du igandean Gitarra Plazara egitasmoaren saioa
Badia Ertzean Herri Ekimenaren jarduera Pasaiako badiaren inguruko herri eta auzoetan egiten ari dira. Kultur ekitaldien bitartez, euskal presoen etxeratzea eskatzea da asmoa.
Donibanen egin zuten hilaren 24an ekitaldia. Gitarra Plazara egitasmoaren saioa egingo dute igandean Lezon. Kulturaren bidez, harresiak bota eta zubiak eraikitzeko asmoa du Badia Ertzean Herri Ekimena garatzen ari den egitasmoak. Auzolan asanblearioa da proposatzen dutena; badiako mugimendu herrikoien, giza eskubideen arloan jarduten duten taldeen eta sare kulturalen ondarea uztartu, eta euskal presoen etxeratzearen mesedera jarri nahi dute. Emanaldietan. bada protagonista amankomun bat: Puerto I espetxean bi euskal presok egindako gitarra.
Pasaiako badiaren inguruko herri eta auzoetan egiten ari dira emanaldiak. Hala nola, lehena San Pedron egin zuten, eta udalerriko hurrengoa joan den igandean Donibaneko Juanba Berasategi aretoan. Donostiako Herrera eta Bidebieta auzoetan ere egin dituzte Gitarra Plazara egitasmoaren barruko kultur saioak. Igandean, Lezoren txanda da.
Hala, 13:00etan joaldunek hasiko dute herri ekinaldiaren Lezoko saioa. Herriko kaleak zeharkatu ondoren, Txerrimuño baserrian egingo dute azken geldialdia, hain baita egunari lotutako herri bazkaria, 14:30ean. Bazkarirako txartelak Tiñelun eta Txerrimuñon eros daitezke.
Bazkarirako tartea emankorra izango da. Izan ere, babes argazkiak aterako dituzte bertaratzen direnekin, eta aldi berean, mus txapelketari ekingo diote hala nahi dutenek.
18:30ean hasiko da elkartasun jardueraren kultur saioa. Lehenik eta behin, egitasmoaren arrazoien eta helburuen berri emateko manifestua irakurriko dute, eta ondoren, hainbat sortzaile eta artistaren laguntzarekin kantaldia abiatuko dute.
