[Galeria] Nere Mujikak eta kantu jirek jaso dituzte Oarsorrak Euskararen Sariak
Ostiralean, Donibaneko Juanba Berasategi aretoan egin zuten sari emate ekitaldia. Une hunkigarri asko izan ziren.
Saridun guztien irudi orokorra. Ostiral arratsaldean egin zuten Donibaneko Juanba Berasategi aretoan -lepo bete zen- 2019ko Oarsoarrak Euskararen Sarien sari emate ekitaldia. Oarsoaldeko Euskara Batzordeak osatutako epaimahaiak Nere Mujika euskaltzale errenteriarrari eta herrietako kantu jirei eman zizkien sariak. Naroa Iturri eta Joxe Juan Ugalde kazetariek gidatu zuten saioa.
Une hunkigarriz betetako ekitaldia izan zen, batik bat, sarituek euren oroigarriak eskura jaso zituzten uneak. Nere Mujikak, saria jaso aurretik ere, hizketaldi mamitsua egin zuen. Eskerrak eman zituen saria jaso duelako, eta adierazi, etxetik datorkiola euskara, “gurasoek eman zidaten euskara”. Euskararen alde egindako ibilbidea errepasatu zuen Herreran jaiotako errenteriarrak, irakasle izan zenekoa, Errenterian arlo askotan egindako lanarena, familian eta hainbat eragiletan egindakoa… Bertsoa eskainiz bukatu zuen haren tartea, eta esan zuen, saria hari eman badiote ere, denena dela, “nik adina lan egindakoak badaude. Zuena eta haiena ere bada sari hau”. Ikusgarria izan zen jaso zuen txalo zaparrada.
Kantu jirako ordezkariek jaso zituzten oroigarriak ondoren. Errenteriako, Lezoko, eta Pasaiako lau barrutietako kantu jiretako bina ordezkari igo ziren oholtzara saria jasotzera. Haien izenean, San Pedroko kantu jirako ordezkari Gema Cesek esan zuenez, kantu jirak euskara kalera ateratzeko, pozez eta alaitasunez, iniziatibak dira. Eta egindakoa eta egingo dutena balioan jarri zituen. Euskara kaleetako txokoetara eramaten dituzte Oarsoaldeko kantu jirek.
Udal ordezkariek ere tartea hartu zuten euren ekarpena egiteko. Pasaiako Udaleko Euskara zinegotzi Loreto Osa eta Oiartzungo Josu Delgadok hitz egin zuten. Eguneroko lan isilari aitortza egitea beharrezkoa ikusi zuten, eta euskararen normalizazioan eta zabalkundean lanean ari direnei aitortza egitea beharrezkotzat ikusi zuten, beti ere, euskara bazterretik erdigunera pasaz. Horretarako, erakundeen eta herritarren elkarlana beharrezkotzat eman zuten, euskararen kudeaketa eremu guztietara eraman behar dela, alegia.
Ikuskizunakn
Sariak emateaz gain, ekitaldi osoa izan zen ostiralekoa. Hala, Tio Teronen Semeak taldekoek dantza emanaldia egin zuten, Hamaika Buelta antzerki taldekoek gogoeta saioa egin zuten antzerki bidez, eta Arrate Arozena Nere Mujikaren alabak, abesti hunkigarria eskaini zien bildutakoei, bereziki amari.
Ekitaldia bukatzeko, denek elkarrekin, Itoitz taldearen Lau teilatu abestia kantatu zuten, EITBren elkartasun maratoian aurkezteko. Behean abestiaren zati bat.
