Euskarari kolore berdea Herri Eskolan
Gaur, Euskararen Egunaren harira, ekitaldiak egin dituzte Lezo Herri Eskolan. Erabileran eragin dute egunotan, jolas batekin.
Herri Eskolako ikasleak, gaur, jolastokian. Lezo Herri Eskolan Euskararen Egunaren barruko ekitaldiak egiten ari dira gaur. Egun berezia. Jolasak, dantzak, karaokea, dantzaldia eta bestelako jarduerak egin dituzte, batetik egunaz gozatzeko, bestetik euskararen erabilerari bultzada emateko.
Gaurkoa, Euskararen Astearen barruko ekitaldia izan da. Eta horren barruan, iniziatiba berezia egin dute: Botilaren ekimena. Horren arabera, ikastetxeko gela bakoitzak botila bat zuen, barruan bi mezurekin —bat gelarako, sari antzekoa gordeta zuena; besteak atzo egin zuten ekitaldi baterako, esaldi baten hitz bat zuena—; eskolako korridoreetan euskararen erabileraren arabera, botila hori urez bete dute. Hala, bi mezu horiek, botilaren goialdera joan dira, eta ur asko izan dutenek, bi mezuak hartzeko aukera izan dute: batean saria zegoen, bestean hitz bat, atzo erabili beharrekoa.
Aldi berean, euskararen erabileraren neurketa azaleratzen zuten botila horietan, koloreak bota dituzte: euskara gehien, hau da, beteen zeuden botiletan kolore berdea bota dute; besteetan, laranja —erabilera ertaina— eta gorria —erabilera eskasa—. Koloreztatutako likido botilak, denak, ontzi handi batera bota zituzten atzo: koloreen nahasketaren emaitza berdea izan zen, hau da, azken astean euskararen erabilera handia izan da Herri Eskolan.
Ikasleak, Euskararen Asterako erabilitako leloarekin, eta ‘Botilaren ekimena’ jardueran osatutako esaldiarekin.
