Jabetze-Eskolako hiru ikastaro berri hasiko dira urtarrilean
Pasaiako Jabetze-Eskolak ikastaro berriak antolatu ditu 2020. urterako. Astegunetan egingo dira saioak Trintxerpen eta Antxon. Izena emateko epea hilaren 14an bukatuko da.
Harremantxo taldearen artxibo irudia. Ikasturte hasieratik martxan dira Pasaiako Jabetze-Eskola eta honen inguruan antolatutako ikastaro eta tailerrak. Oraingoz ehundik gora emakumek bat egin dute ikastaro horiekin, eta 2020an zenbaki horrek gora egiten espero dute, izan ere, urtarrilean 3 ikastaro berri antolatuko dituzte.
Pepa Bojok Nire zentroa berreskuratzen: gorputza lantzeko proposamena izeneko ikastaroa gidatuko du urtarrilaren 13tik martxoaren 16ra. Trintxerpeko Alkateordetzan izango dute egoitza astelehenetan 15:00etatik 16:30etara.
Elikadura eta osasuna, elkartzeko eta ikasteko gunea abiatuko dute Tatiana Arzelus eta Nekane Tomasenak 5 hilabetez, urtarrilaren 8tik maiatzaren 20ra. Saioak asteazkenetan izango dira, 18:00etatik 20:00etara Pasai Antxoko azokan.
2020an hasiko den lehen ikastaroa, eta luzeena, Autoezagutza heldutasunean “Bizitzaren bigarren zatian, norberaren aurkikuntzan” izango da. Clara Wolfram izango da arduraduna eta urtarilaren 7tik maiatzaren 26ra egingo da astearteetan 17:00etatik 19:00etara, Trintxerpeko Karmengo Ama ikastetxean.
Pasaiako Udaleko berdintasun sailak gainera, beste hainbat talde iraunkorrekin bat egiteko aukera dagoela oroitarazi du, hala nola, zainketaren inguruko taldea, zaintza lanetan jarduten duten emakumeentzako gunea, eta indarkeria matxista bizi izan dutenentzako Autolaguntza Taldea.
Pasaiako edozein HAZ bulegotan eman ahalko da izena hilaren 14ra arte. Informazio gehiago nahi dutenek, posta elektronikoz eskatu dezakete edota telefonoz, 943004320 zenbakira deituz.
Pasaiako Berdintasun Mahaiko kideek (Harremantxo, Bekoz Beko, Azkuene, Topaketa, Lagun Artea, Pasaiako Udalaren Berdintasun Arloa eta emakume pasaitarrak) bultzatuta, jabetze-eskola hausnarketarako, sendotasunerako eta topaketarako gunea izaten jarraitu du.
Mahaiko kideen arabera, xedea emakume pasaitarren saretze eta ahalduntze prozesua indartzea da, betiere, helburu hauek aintzat hartuta: emakumeen eta emakume taldeen autonomia indartzea, sormenezko lana ezagutzera ematea eta emakumeek gizartean eta politikan parte har dezaten suspertze lanak egitea eta emakumeen artean trukean oinarritutako sareak sortzea eta bultzatzea.
