Etxeko langileen errealitatea, Emakumeen Etxean
Hilabete honetarako agenda oparoa atondu du Emakumeen Etxeak. Hitzaldiak, antzerkia, eta liburu aurkezpena antolatu dituzte, besteak beste.
Emakumeen Etxean aurretik egindako beste mahai inguru bat. Egitarau oparoa antolatu du Emakumeen Etxeak abendurako ere, eta agendari hasiera emateko etxeko langileen errealitatea azaleratuko du. Gaiaren gaineko hausnarketa egingo dute eta horretarako, SOS Arrazakeria Gipuzkoak aurkeztu egingo du joan den ekainean Jone Urionaguenak etxeko langileen egoerari buruz egin zuen azterketa. Ostegunean (hilak 5) 18:00etan hasiko da aurkezpen hori. Horrekin batera, Chica seria y responsable film laburra emango dute; etxeko langileen taldeko sei kideren testigantzak eta esperientziak bilduta daude filmean, eta protagonistetako batekin eztabaidatzeko aukera zabalduko dute gero.
Guatemala eta Nikaraguako tokiko feminismo komunitarioa ezagutzeko aukera eskainiko du, bestalde Emakumeen Etxeak. Batetik, hilaren 10ean (asteartea) 18:00etatik 20:00etara tokiko feminismo komunitarioa: bizitzaren defendatzaileak izeneko hitzaldia antolatu dute. Lorena Cabnal, Ixina eta Alex Vasquezen arteko elkarrizketak entzungo dira. Hirurak, Iximulew-Guatemalako tokiko feminismo komunitarioaren antzinako sendatzaileen sareko kideak dira eta gorputzari buruz defentsarako lehen lurralde gisa, eta sanazioa bide kosmiko politiko gisa hitz egingo dute, besteak beste.
Bestetik, Sandinoren biloben aurkako errepresioa hitzaldia antolatu du Emakumeen Mundu Martxak hilaren 20an 18:30ean. Nikaraguan dagoen gobernuaren errepresioa, bereziki feministen aurka ezagutaraziko dute. Iximulew-Guatemalako tokiko feminismo komunitarioaren antzinako sendatzaileen sareko kideek espazio politiko espirituala eskainiko dute amaitzeko.
Antzerkiak ere izango du tartea. Hilaren 12an (osteguna) izango da hori. Ultramarino payasok ekoiztutako Las Chirlas: mision insumision clown ikuskizuna eskainiko dute 18:30ean. Emakumeek barre egiteko lana da. Emanaldiaren ondoren, solasaldia egongo da Oihana Parada eta Esther Bizarro pailazoekin.
Feminismoa %99. Manifestu bat liburua aurkeztuko dute Emakumeen Etxean hilaren 17an (asteartea) 18:00etan. Danele Sarriugarte itzultzailea eta Maider Galardi kazetaria arituko dira liburuaz. Manifestu horrek aldarrikatzen duen ezkerreko feminismoak egungo eredu neoliberalari oposizio bateratua egin dio; emakumeen gehiengoaren egoerak eta premiak erdigunean jarri eta gorabehera politiko, ekologiko, sozial, ekonomiko eta erreproduktiboak aintzat hartu ditu.
Emakumeen Etxeak aste osoan zehar ateak zabalik dituela ekarri dute gogora; astelehen eta ostiraletan, 09:00etatik 13:00etara dago zabalik, eta asteartetik ostegunera arratsaldez, 16:00etatik 20:00etara. Telefono zenbakia, honakoa: 943 449 630. Posta elektronikoa ere erabili daiteke Emakumeen Etxearekin harremanetan jartzeko.
