Hilaren 27an egingo da Antxoko X. Gabonetako Krosa
20:30ean hasiko da eta guztira, 6,3 kilometroko ibilbidea izango du krosak. 250 korrikalariko kupoa izango du Gabonetako lasterketak.
2018ko Antxoko Gabonetako Krosaren irudia. Azken urteetan bezala hilaren 27an antolatuko da Pasai Antxoko Gabonetako Krosa. Aurtengoa 10. edizioa izango da. 6,3 kilometroko ibilbidea burutu beharko dute parte hartzaileek, Gure Zumarditik hasita. Izena emateko epea zabalik izango da hilaren 26ra (barne) arte, Kirolprobak plataformaren webgunean 10 euroan. Antxotarrak Lasterlari Taldeak antolatzen du herri lasterketa.
Aurreko urteetako arrakastaz jakitun izanda, aurten ere korrikalarien kupoa aise beteko dutela aurreikusi dute antolatzaileek. 250 korrikalarirako kupoa izango du krosak. Dena dela, dortsalak geldituko balira, horiek lasterketaren egunean jarriko lirateke salgai, 12 euroan, Ibaiondo pilotalekuan, 17:30-18:30 tartean.
Krosaren egunean, 18:00etatik 20:00etara jaso beharko dituzte haien dortsalak, pilotalekuan bertan, izena emana dutenek. Ordu erdi geroago, 20:30ean, hasiko da lasterketa Gure Zumardian. Antolatzaileek kontsigna eta dutxa zerbitzua eskainiko dute Ibaiondon, baita masajeak ere, BI-K eskolari esker. Krosari amaiera emateko sari banaketa egingo dute Ibaiondon 21:45etik aurrera. Indarrak berreskuratu ditzaten, salda beroa eta txorizo egosia emango diete parte hartzaileei. Horrekin batera, Korrikalarien Poltsa jasoko dute, opari berezi batekin.
2018ko saridunak.
Aurten 11 sari banatuko dira; emakumeen eta gizonen kategorietan lehen hirurek jasoko dituzte sariak. Lehen gizon eta emakume beteranoentzat ere garaikurra izango da, baita lehen emakume eta gizon pasaitarrentzat ere. Umoreak ere aitortza jasoko du, mozorrorik onenak ere saria izango du eta.
Antxotarrak Lasterkari Taldeak antolatuko du aurten lehen aldiz Antxoko Gabonetako Krosa, izen berriarekin —lehen Ogi Berri Azkuene Triatloi Taldea izena zuen— eta Pasaiako Udalaren eta Antxoko Jai Batzordearen laguntza izan dute uneoro, proba aurrera eraman ahal izateko. Era berean, Antxoko denda eta komertzioei eskerrak eman dizkie Antxoatarrak Lasterkari Taldeak, haien ekarpena funtsezkoa baita Antxoko Gabonetako Krosa antolatzeko. Herrian duten garrantzia dela eta, “Gabonetan zein edonoiz tokiko dendetan erosteko” eskatu die taldeak herritarrei.
