Moita udalerriko ordezkariei harrera egin die Pasaiako Udalak
Portugalgo Moita herria 2020ko Pasaia Itsas Festibaleko gonbidatua izango da, bi herrien iragana, oraina eta etorkizuna itsasoari lotua baitago.
Gertutasuna izan da nagusi gaur Pasaiako udaletxean. Pasaian dira dagoeneko Moita (Setubal, Portugal) udalerriko ordezkariak Albaola Itsas Kultur Faktoriak gonbidatuta. Moita izango da 2020ko Pasaia Itsas Festibaleko gonbidatuetako bat, haiek ere itsasoari begira hazi baitira eta itsasoari begira hazten jarraitu nahi dutelako.
Gaur goizean harrera egin die Pasaiako Udalak Arizabalo jauregian. Udala da Pasaia Itsas Festibalaren beste antolatzaile nagusia eta ondorioz, indar politiko guztietako zinegotziak zain izan dituzte Moitako ordezkari publikoek. Xabier Agote Albaola Itsas Kultur Faktoriako presidentea ere bertan izan da.
Talde politiko guztien ordezkariek egin diete harrera Moitakoei.
Pasaiako Alkate Izaskun Gomezek, bi herriak batzen dituen elementua nabarmendu du, itsasoa “bion garapena itsasoari lotutakoa da ezinbesteak. Zuek ibaiaren ikuspegitik begiratzen diozue eta guk portuaren ikuspegitik”. Moita Setubalgo barrutian dago kokatua, Lisboatik nahiko gertu, baina Tajo ibaiaren estuarioaren beste aldean. Faktore demografiko, geografiko eta historiko amankomunak dituzte Pasaiak eta Moitak.
XX. mendean, Pasaia portugaldar askoren etxea bihurtu zela gogorarazi du alkateak, “pasaitar osoak dira, eta esango nuke gure udalerrian Europar Batasuneko atzerritar kolonia handiena direla. Hori dela eta, ez da batere bitxia portugesa entzutea gure kaleetan”. Gertutasun handia erakutsi diete alkateak zein beste ordezkariek, eta Pasaian “etxean bezala” sentitzeko eskatu diete.
Herriez haratago, Portugal eta Euskal Herriko marinelei aitortza egiteko aukera izango da Itsas Festibala, “500 urte bete dira aurten, Fernando Magallaes eta Juan Sebastian Elkanok gidatutako espedizioak munduari lehen bira eman zionetik. Haiekin batera Euskal Herriko eta Portugalgo marinel ugari zeuden”, adierazi du Gomezek.
Ekitaldi xumeari amaiera emateko opariak eman dizkiote elkarri; udalerrien historia jasotzen duen liburu bana eman diote elkarri. Gomezek gainera, Pasai Donibaneko marrazki bat ere eman die Portugalgo lagun berriei.
