PSE-EE: "Kontra egitea genuen, edo arduraz jokatu eta ekarpena egin"
Emendakin transakzionalarekin lortutako adostasuna ez dela inongo "txeke zuririk" esan du alderdi sozialistak, eta "kritiko" jokatuko duela ziurtatu.
PSE-EEko Jose angel Rodriguez eta Isaac Palencia gaurko agerraldian aurrekontuen gaineko balorazioa egiten. Asteartean 2020ko aurrekontua onartu zuen udalbatzak. Bidean alderdi sozialistarekin transakzionatutako emendakina txertatu zuten, EH Bildu, Elkarrekin Errenteria eta PSE-EEk babestuta, eta EAJren kontrako botoekin eta PSE-EEren abstentzioarekin aurrera egin zuen aurrekontuak.
Balorazioa egin dute gaur PSE-EEko Jose Angel Rodriguzek eta Isaac Palenciak. Urrats garrantzitsua izan zela asteartekoa esan du Rodriguezek, “orain herritarrei azalpenak ematea tokatzen zaigu”. Beren alderdiak, gizarte gaietan eta ingurumen arloan jarri duela fokua errepikatu du gaur alderdi sozialistaren bozeramaileak, “gobernu taldearen aurrekontu proiektuan gizarte zerbitzuetan %2,62 eta Ingurumen arloan %11,51 murriztu zuten aurrekontua; hori ez zen onargarria gure alderdiarentzat eta hasieran aurkeztu genuen proposamenak murrizketa horiek ezabatu, lan planetara diru gehiago bideratu, lankidetza garapenerako diru laguntzetan %0,7ra iritsi eta herriko hainbat eremutan presazkoak diren interbentzioak ziurtatzea zuen helburu”.
Argi esan du Rodriguezek, “ez dugu EH Bilduren aurrekontua partekatzen, ezta bere hiri eredua ere”, baina bi aukera zituztela erantsi du, “kontra egin besterik gabe eta ekarpenik egin gabe, edota arduraz jokatu eta aurrekontua hobetzen saiatu”. Bigarren aukeraren alde egin zutela esan du. Emendakin transakzionalarekin lortutako adostasuna ez dela inongo “txeke zuririk” esan du eta “kritiko” jokatuko duela alderdi sozialistak ziurtatu: “Kritiko eta eraikitzaile jokatuko dugu eta adostutakoa betetzen dela bermatuko dugu, kontrol zehatza egingo baitugu. Lanean jarraituko dugu Errenteria eta errenteriarren bizitza hobetzen jarraitzeko”.
Transakzionatutako emendakinak ez dituela hasieran zituzten espektatibak bete ere esan du alderdi sozialistaren bozeramaileak, baina ziurtzat eman du, aurrekontua hobetu egin duela adostasun horrek eta arduraz jokatu dutela erantsi du, “jakinda hobetu daitekeela gehiago”.
Ildo beretik mintzatu da Palencia eta erabat ase ez badira ere, zati bat behintzat lortu dutela eta horrek onurak izan dituela aurrekontuarentzat esan du. “Zenbakiak argiak dira, eta gizarte zerbitzuetan zegoen murrizketa ezabatzea lortu dugu akordioarekin. Dena ez da gainera zenbaki kontua, hainbat programa ere txertatu dira: bakardadearen gaineko prebentzioa lantzeko, pobrezia energetikoaren diagnostikoa, ludopatiaren prebentziorako, enplegu planetara 50.000 euro gehiago bideratu dira, eta diru laguntza izendun eta ohikoetako irizpide, epe eta balorazioen inguruko hausnarketa egingo da besteak beste. Izan ere, ezin dugu ulertu hainbesteko lana egiten duten gizarte eragileen kasuan zergatik ez dagoen halako diru laguntzarik, kirol, kultur eta bestelako eragileekin dagoenean”.
Ingurumen arloan ere hobetu egin duela transakzionatutako emendakinak aurrekontua esan du Palenciak, “murrizketa ez da ezabatu osorik, baina erdira jaitsi da, eta %5ekoa izango da. Halaber, hondakinen prebentziorako ekintzak txertatu dira, sentsibilizazioan ere egingo da inbertsioa, led argiak jartzeko 56.000 euro gehiago bideratuko dira, eta klima aldaketari aurre egiteko ekintzetarako 50.000 euro gehiago bideratu dira”.
PSE-EEren hirugarren eskera, lankidetza garapenerako diru laguntzetan %0,7ra iristea zen, “horren harira larrialdi humanitariora bideratutako laguntzen diru zorroa 9.000 euroan handitu da eta 0,7 hori agintaldi amaieran lortzeko konpromisoa dugu”. Horren gaineko mozioa aurkeztuko du alderdi sozialistak hilabete honetako ohiko plenoan.
Horrekin batera, Galtzarabordako parkeko pergola birgaitzea; Sorgintxulo kaleko igogailua egokitzea; irisgarritasun azterketa egitea Aita Donostia eta Maurice Ravel kaleetan; eta kale asfaltatzea jaso dela aurrekontuan akordioari esker gaineratu du. “Ez da gure aurrekontua, asko hobetu daiteke —esan du Rodriguezek— eta horregatik abstentzioaren alde egin genuen; abstentzio eraikitzailea izan da eta kritikoa ere izango da”.
