'12 cm' erakusketa antolatuko dute Pasaia eta Hendaiako Udalek
Aurten ere elkarlanari eutsi diote bi udalek, izan ere, erakusketa bateratuaren 24. edizioa izango da. Pasaian hilaren 13tik urtarrilaren 19ra izango da ikusgai.
2018ko '12 zm' erakusketaren artxibo irudia. Pasaiako eta Hendaiako Udalek antolatutako 12 cm erakusketak 24 urte beteko ditu, kasik mende laurdena eta bi erakundeen arteko elkarlanaren eredu argiena da. Pasaian egingo du lehen geldialdia 12 cm erakusketak; hilaren 13tik 2020ko urtarrilaren 19ra arte ikusgai izango da, San Pedroko Udal Aretoan asteartetik larunbatera 18:30etatik 20:30etara eta igande eta jaiegunetan, 11:30etatik 13:30etara. Inaugurazio egunean, mokadutxoa jango dute eta zuzeneko musika emanaldia eskainiko da.
Jarraian Lapurdira eramango dute. Urtarrilaren 29tik otsailaren 15era Hendaiako Mendi Zolan Kulturguneak hartuko du erakusketa. Margolanak Nafarroako Erriberan ere ikusi ahalko dira, izan ere, Arguedasen jarriko dute berriro 12 cm erakusketa martxoaren 29tik apirilaren 13ra arte.
Parte hartzeko bi baldintza ezarri dituzte antolatzaileek: bi margolan aurkeztu beharko dira eta tamaina 12 zentimetrokoa izan beharko du gehienez, (markoa edo euskarria barne). Ohi bezala, Imanol Irigoien margolariak erakusketan parte hartuko du. Altzako artistak erakusketa esanguratsu bezain bitxia dela adierazi du, “aurkeztutako miniaturazko lanen kolore zein askotariko forma ederrak gozatzeko aukera emango die bisitariei”. Irigoienek bi lan aurkeztuko ditu: 12 cm (R. Ugarte gogoan) eta Castelao oroitzen, bere autokarikatura oinarri.
