Dena prest Antxon, San Tomas azokan ezin hobeto pasatzeko
Hilaren 14an (larunbatean) egingo da San Tomas eguneko azoka Pasai Antxon eta ohi bezala egitarau zabala prestatu dute herritarrek.
Antxoko San Tomas azoka. Argazkia: Pasaia Lezo Lizeoa. Bi aste barru Eguberriak bete-betean izango dira. Gaztaina erre usainak eta kaleko argiek dagoeneko hasi dira Pasaiako kaleak girotzen eta datorren astean Antxok jai historiko bat hartuko du; San Tomas azoka alegia. Ohiko legez, Antxoko azoka San Tomas eguna baino lehenago izango da. Aurten hilaren 14ean (larunbata) egingo dute, eta beti bezala, Antxoko Gure Zumardiaren inguruan 12:00etatik aurrera.
Gastronomia, kultura, artisautza eta nola ez, jai giroa abileziaz uztartuko dituzte. Gainera, herritarrek, eragile kulturalek, ikastetxeek eta tokiko komertzioek bat egingo dute festan, denek egingo baitute haien ekarpena. Nabarmentzeko modukoa da falkoneria postua jarriko dutela berriz ere Antxon, hau da, hegazti harrapariak ikusteko aukera izango da. Baserriko abereak ikusi ahalko dira azokan, txerria, ardia edota behiek garai bateko azoken kutsua emango diote Gure Zumardiari.
Hegaztiez gain, ez dira falta bestelako artisautza postuak; zeramika, lore lehorrak, arropa… topatuko dituzte bisitariek. Aukera bikaina izan daiteke Eguberrietako erosketak egiteko. Guztira 14 postu jarriko dira. Txistorra pintxoak jan ahalko dira uneoro eta nahi duenak, sagardo baso batekin osatu ahalko du otordua. Eguberrien atarian izanda opariak ere egingo dituzte; otar bat zozkatuko dute. Plazan bertan gainera, Antxoko Topaguneak bazkari herrikoia egingo du.
Musikarekin girotuko dute jaia, txaranga batek barrutiko kaleetan zehar joko du eta. Txarangarekin batera, Pasaia Lezo Lizeoko ikasleek Eguberrietako hainbat kanta abestuko dituzte.
