Andra Marik Gabonetako kontzertu berezia egingo du larunbatean
Eguberriaren atarian, emanaldi berezia ondu du Andra Mari Abesbatzak larunbaterako. Emanaldiaren edukia, formatua eta kontzertua hartuko duen lekua ere bereziak izango dira aurten.
Sierra eta Collar gaurko agerraldian. Eguberriaren atarian, emanaldi berezia ondu du Andra Mari Abesbatzak larunbaterako. Emanaldiaren edukia, formatua eta kontzertua hartuko duen lekua ere bereziak izango dira aurten. Hala azaldu du Andra Mari abesbatzako zuzendaria, Andoni Sierrak, emanaldia aurkezteko Ion Collar Kultura Zinegotziarekin batera egin duen agerraldian.
Aurtengo emanaldian, denboran barrena egindako bidaia proposatu du abesbatzak; hala, XVI eta XVII. mendeetan Europako hainbat herritan ohiko ziren eguberri kantak bildu dituzte. Eguberritako zaratatik ihesi egiteko aukera emango du Andra Mariren kontzertuak Sierrak azaldu duenez, “gehiegikerietatik ihes egin eta barrura begiratzen duen kontzertu intimista izan nahi du”.
Espiritu horren bila, kontzertua egiteko eremua ere aldatu dute aurten eta aurreko ekinaldietan Fatima Andrta Mariaren eliza aukeratu badute ere, aurten, Madalenaren Basilikak hartuko du kontzertua. Abesbatza ere ez da osorik arituko emanaldian, 30 abeslari izango dira basilikan, “Andra Mari Musika Kapera izena jarri diogu”, eta formatu txikiko Wave in tempo taldeko bost musikariak izango dituzte lagun. Azken horiek, gainera, XVI eta XVII mendeetan erabiltzen ziren instrumentuak joko dituzte. Talde gaztea da Wave in tempo, Ismael Campanero kontrabaxu jotzaileak zuzentzen du, baina “eskarmentu handikoa” da Sierraren hitzetan.
Emanaldia atsegina, entzuteko erraza eta publiko guztientzat egokia izango dela nabarmendu du zuzendariak, “herritar guztiak deitu nahi ditut parte hartzera”.
Collarrek eskerrak eman dizkio Andra Mari abesbatzari eta egiten duen lana aitortu, “musika berreskuratzeko egiten duzuen saiakera izugarria da, eguneratu egiten duzue bere hasierako esentzia mantenduta”. Errenteria-Oreretaren musika ondareari erreparatu dio gero, “azken batean, gure herrian abesbatza ugari, parte hartzaile asko, eta publiko zabala baldin badago, egiten duzuen lanari esker delako”. Berak ere parte hartzera deitu ditu herritarrak.
Kontzertua, larunbatean 20:00etan, Madalenaren Basilikan.
