Maitane Etxeberria lezoarra, eskubaloiko mundialeko finalerdietan
Japoniako Munduko Txapelketan lan bikaina egiten ari da lezoarra. Finalerdietako partida ostiralean du, Norbegiaren kontra.
Maitane Etxeberria. Argazkia: Bat Basque Team. Maitane Etxeberria (Lezo, 1997) Espainiako Eskubaloi Selekzioarekin ari da lehian Japonian jokatzen ari den Eskubaloiko Munduko Txapelketan. Espainiako selekzioak finalerdietarako txartela lortu du gaur, goizean jokatutako partida Errusiaren kontra galdu arren (36-26), Suediak ez duelako berea irabazi. Finalerdietako partida ostiralean du Etxeberriak, Norbegiaren kontra, 09:30ean (Euskal Herriko ordua). Oso maila altua ematen ari da Etxeberria.
Bera Berako jokalaria da lezoarra. Baina eskubaloiko hastapenak Lezon egin zituen. 16 urte zituela egin zuen debuta, Bera Berarekin, Emakumeen Ohorezko Mailan. 2017 martxoan jokatu zuen lehen aldiz Espainiako Estatuko selekzioarekin. Normalean, eskuineko hegalean jokatzen du.
