Gabonetan ere, kirolak ez du etenik Lezon
Bekoerrotak kirol txokoa jarriko du, Munttarpe eskubaloi taldeak campusa antolatuko du eta bi gurpilen zaleek 'saket scooter' tailerra izango dute.
Lezok kirol eskaintza berezia izango du Eguberrietan. Eguberrietan izanagatik ere, Lezoko kirol eskaintzak ez du etenik izango, are gehiago berritasunak izango dira oporraldiak iraun bitartean. Ez da aitzakiarik izango Eguberrietako otorduetan hartutako kaloriak ez erretzeko, bereziki haur eta gazteek.
6 eta 12 urte bitarteko haurrei zuzendutako kirol txokoa jarriko dute Bekoerrota kiroldegian. Hainbat kiroletan aritzeko topalekua izango da finean. Eskalada, igeriketa, patinajea eta bestelako kirol batzuk probatzeko aukera izango da bertan. Kirolak bi multzotan banatuko dira eta ekintzak lau egunetan banatuko dira. Lehen multzokoak hilaren 23, 24, 26 eta 28an egingo dira eta bigarren multzokoak hilaren 30 zein 31n eta urtarrilaren 2 eta 3an egingo dira.
Goizeko ordutegia izango du kirol txokoak, 9:30etatik 12:30etara. Pasaia, Oiartzun, Errenteria eta Lezoko bazkideentzat 40 euroko prezioa izango du eta bazkide ez direnentzat 50 eurokoa. Izena emateko hiru bide aipatu ditu Lezoko Udalak. Bekoerrota kiroldegian bertan, posta elektronikoz edota telefonoz, 943510311 zenbakira deituz.
Munttarperen campusa
Munttarpen ere ez dute atsedenik hartuko Eguberrietan. Taldeak eskubaloi campusa antolatuko du LH 3, 4, 5 eta DBH 1eko gaztetxoentzat. Hiru saio izango ditu campusak, hilaren 30, 31n lehen biak eta azkena urtarrilaren 2an 11:30etatik 13:00etara. Bekoerrota kiroldegiak hartuko bi saioak.
Interesdunek 20 euroko ordainketa egin beharko dute honako kontu korronte zenbakian: ES41 2100 5396 9602 0007 6410. Informazio gehiagorako idatzi 618859028 Whatsapp zenbakira, edo Munttarpe taldeko helbide elektronikora.
Skate Scooter
Geroz eta ohikoagoa da Skate Scooter-ak —patin elektrikoak— gora eta behera ikustea. Askotan gainera, polemika eragin dute, arriskutsuak direlakoan. Muturreko Kirol Klubak Skate Scooter-ak behar bezala gidatzen ikasteko lantegia antolatuko du Eguberrietan.
Bi tailer egingo dituzte Bekoerrotako Koldobike Gezala kiroldegian; lehena hilaren 28an 16:00etara 19:00etara eta urtarrilaren 4an ordutegi berean.
