Neguko oporrak haur eta nerabeen neurrira
Neguko Oporrak programa antolatu du udalak haur eta nerabeei begira. Hilaren 23an jarriko dute martxan programa eta horren barruan antolatu dituzten ekintzak 4-17 urte arteko haur eta gazteei begirakoak dira eta doan.
Neguko Oporrak programa antolatu du udalak haur eta nerabeei begira. Hilaren 23an jarriko dute martxan programa eta horren barruan antolatu dituzten ekintzak 4-17 urte arteko haur eta gazteei begirakoak dira eta doan. Hilaren 23, 26, 27, 28, 30 eta urtarrilaren 2, 3, eta 4 egunetan haurren txokoa izango da 6-12 urte artekoentzat. Goizetan Errenteriako ludoteketan egingo dira ekintzak 10:30etik 13:00etara eta bertako erabiltzaileei zuzendurik daude eta arratsaldean, berriz, haur guztiek parte hartu ahal izango dute. Arratsaldeko saioak 23an eta 30ean ludoteketan egingo dira, abenduaren 26an eta urtarrilaren 2an Koldo Mitxelena ikastetxeko patioan eta hilaren 27an eta urtarrilaren 3an, Jose Luis Caso aretoan.
4 urtetik aurrerakoentzat zinema izango da bi goizetan Niessen zinemetan 11:00etan eta ordu erdi aurretik zabalduko dituzte ateak. Hilaren 28an, Mr Link filma antolatu dute eta urtarrilaren 4an, Playmobil. Gonbidapenak zinema saio aurreko egunetan banatuko dira arratsaldez Koldo Mitxelena ikastetxeko jolastokian eta Jose Luis Caso aretoan. Sarrera kopurua mugatua da.
10 urtetik beherako haurrak, heldu batek lagunduta joan behar dute (heldu bakoitzeko gehienez hiru haur).
Nerabeei begira, berriz, 13-17 urte artekoentzat Gaztelekuetan programazio berezia prestatu dute. Hilaren 23an, eta 27an Gabierrota zein Beraungo Gaztelekuek ordutegi berezia izango dute: 16:00etatik 20:00etara. Hilaren 26an zinemara joateko aukera izango dute. Foru plazan elkartuko dira 16:00etan eta ekintzak 4 euro balio ditu. hilaren 28an, berriz, gazte talde batek prestatu duen Izuaren Etxea izango da Bizarain ikastetxean 18:00etatik 21:00etara. Hilaren 30ean berriz, gaztelekuetan izena eman duten gazteak scape roomera joango dira Pontikako Hibaikako biribilgunetik. Ekintza honek 8 euro balio ditu.
Informazio gehiago eskuratu nahi dutenek posta elektronikora idatzi, gazteriaren web orrialdera sartu,. 943 449 600 telefono zenbakira deitu edo Zu! Zure Udala arreta zerbitzura zein Merkatuzar eraikineko hezkuntza eta gazteriaren bulegoetara jo dezakete.
