13/20 Arte Tailerra, ametsak marrazteko espazioa
13/20 Arte Tailerra zabaldu du Ainhoa Redondo ilustratzaileak Alde Zaharrean. Marrazketa, pintura eta ilustrazioa landuko dituzte bertaratzen direnek.
Arkatz, olio pintura, eta pintzel artean sentitzen da gustura, sorkuntzari bide eman eta askotariko ilustrazioak sortzea du ofizioa eta afizioa. Dakiena konpartitu nahi du, eta horretarako, sorkuntzarako espazioa sortu du beste batzuk ere goza dezaten marrazketa eta ilustrazioarekin. 13/20 Arte Tailerra zabaldu du Erdiko Kaleak eta Orereta kaleak bat egiten duten egur eta erakusleiho zabaleko lokalean. Ez da ausazkoa izena, 1320 urteko Oreretari egin dio keinu, «eraldaketa garaia izan zen hura herriarentzat eta nik ere eraldatu nahi dut».
Aste honetan zabaldu ditu Ainhoa Redondok bere tailerraren ateak. Berri usaina du, pintura eta egur usainak egiten diote ongietorria bertaratzen denari, kaballete eta atrilez inguratuta. Goizez bere ilustrazio lanak egingo ditu bertan, eta arratsaldez tailerra. Abenduan hasi zuen izena emateko kanpaina, eta 27 lagunek bat egin dute dagoeneko; denak haurrak, momentuz.
Pozik dago Redondo izaten ari den erantzunarekin, eta pozik ametsa betetzen hasi delako Errenteriako Alde Zaharrean kokatutako bere tailerra egi bihurtuta. Marrazketa, pintura eta ilustrazio ikastaroa eskainiko die 6 urtetik gorakoei: «Ilustratzailea izanik, ilustrazioaren aplikazio guztiak erakustea da asmoa, album ilustratuak, ilustrazioak ere badaude kamisetetan, karteletan, objektuetan, gauza anitzetan». Halere, ilustrazioaz gain, pintura ere landuko du bertaratzen direnekin.
Askotariko material eta teknikak
Elementu eta material ezberdinekin ariko dira, eta hainbat teknika ikasiko dituzte: «Grabatua, serigrafia, estanpazioak egiten ikasiko dute bertaratzen direnek, eta marrazketa akademiko oinarrizkoa ere landuko du ariketa sinpleen bidez nahi duenak, hau ez delako ikastaro zurruna; nik proposatu egingo dut, eta gero nahi duenak bat egingo du. Nahi dudana da esperimentatzea eta ondo pasatzea esperimentatuz». Esperimentazio horretarako arkatzez gain, pastel oleoak, akrilikoak izango dituzte eskura. Batzuentzat ezagunak izango dira, baina beste batzuentzat, berriz, berriak, «bakoitzak bere proiektu pertsonalak sortzea da xedea».
Egoitzan egingo dute ikastaroa, baina kalea ere badu helburu Redondok, eta marraztera bertara atera nahi ditu aldian behin ikastaroko parte hartzaileak, «nahi dut jendea ziztatu kalean, etxean eta nahi duen lekuan marraz dezan».
Ezagutzarik ez da behar, «irekia» dela dio ilustratzaileak, «egia da etorri direnak zaletasuna dutelako bertaratu direla, marraztea gustatzen zaielako».
Proiektuarekin helburu nagusi bat du Redondok: «Disfrutatzea, jendea gustura etortzea nahi dut; espazio goxoa sortu dut, eta espero dut jendea gustura egotea, gehiago marraztea eta pinturaz disfrutatzea». Saioak 16:00etatik 17:30era eta 17:30etik 19:00etara ditu momentuz; 90 minutukoak dira, astean bitan edo behin. Ordutegian moldaketak egitera irekita dago, eskaeraren arabera.
Izena eman nahi dutenak tailerretik pasa daitezke 10:00etatik 13:00etara eta 17:00etatik 19:00etara, edota posta elektronikora mezua bidal dezakete.
