[Galeria] Gazteentzako alokairuzko 51 etxebizitza, bizilagun bila
36 urtetik beherako gazteei begirakoak dira; 46 logela bakarrekoak, hiru egokituak, eta beste hiru bi logelakoak.
Jauregi, Otaegi eta Arriola zuzkidurazko Bizitokietara egindako bisitan gaur. Arramendi ondoan eraiki dituzten gazteentzako zuzkidurako apartamentuen eraikina aurkeztu dute gaur. 51 bizitoki dira, 46 logela bakarrekoak, hiru bi logelakoak, eta hiru egokitutakoak, guztiak Errenteria-Oreretan erroldatuta dauden 36 urtetik beherako gazteei begira. Gehienez hiru laguneko familia unitateek dute sarbiderako aukera, bertan, bizitokien tamaina kontuan hartuta.
Iñaki Arriola Lurralde Plangintza, Etxebizitza eta Garraioetako Sailburuak, Pedro Jauregi Etxebizitza Sailburuordearekin eta Aizpea Otaegi alkatearekin batera bisitatu du eraikina. 4,2 miloi euroko inbertsioa egin duela Eusko Jauralaritzak etxebizitza horiek eraikitzeko azaldu du sailburuak. Bizitokiak, aldi baterako alokatuko zaizkie gazteei, gehienez ere botst urtez, eta esleipendun suertatzen direnek hileko kanon bat ordainduko dute beren diru sarrera haztatuen %30a gaindituko ez duena.
Obra garrantzitsua dela esan du Arriolak, “jakin badakigu gazteen emantzipazioa atzeratzen ari den arazo nagusietako bat etxebizitzaren garestitasuna dela, lan faltari eta prekarietateari lotuta, eta pandemia, zoritxarrez, egoera hori larriagotzen ari da. Baina egoera hori zuzentzeko urratsak egiten ari gara, lehentasunezko kolektibo bat izaten ari dira gazteak”. Horren harira, datu bat ere eman du sailburuak: Errenterian alokairuzko etxebizitza eskatzen dutenen %33a 36 urtetik beherakoak dira, “horrek esan nahi du eskatzaileen kopuru handi bat gazteak direla”.
Zuzkidura bizitokiekin batera (ZB) Gaztelagun laguntzak eta etxebizitza sozialak lehentasunez eskuratzeko kupoak aipatu ditu. Gaztelagun laguntza jasotzen dute egun Errenteria-Oreretako 45 gazteek.
Zuzkidura etxebizitzen bidez gazteak lehen aldiz emantzipatzeko aukera izan dezaten bilatzen dutela erantsi du.
51 zuzkidura etxebizitzez gain, Etxebizitza Sailak Errenterian 119 alokairuko etxebizitza dituela azaldu du, “23 Alokabideren parkekoak, sei Eusko Jaurlaritzaren parkekoak, 86 alokairu publikorako etxebizitza pribatuak mugiarazten dituen Bizigune programakoak, eta lau ASAP programakoak, guztiak ere Alokabidek kudeatuak”. Arriolak instituzioen arteko elkarlana beharrezkotzat jo du, “batez ere udalekin mota honetako proiektuak aurrera atera ahal izateko. Finean, udalekin hitzarmenak egiten dira, azken horrek lurra utzi eta Etxebizitza Sailak eraikina egin eta Alokabideren bidez alokairuak kudeatzen ditu. Testuinguru horretan, eskerrak eman nahi dizkiot Errenteriako Udalari”.
Juan Carlos Merino PSE-EEren azken alkatea Errenteriako Udalean ekarri du gogora amaitzeko Arriolak, “2.008an sustatu zuen proiektu hau; denbora pasa da baina gaur errealitatea bihurtu da”.
Aizpea Otaegik emantzipazioa jarri du erdigunean, “funtsezkoa da gazteek beren bizi proiektuak aurrera atera ahal izateko. Europako bataz besteko emantzipaziorako adinetik gora gaude, nabarmena da beraz, irtenbideak beharrezkoak dira gazteei erantzuna emateko”. Alokairuko zuzkidura bizitokien balioa nabarmendu du alkateak, eta udala eta Eusko Jaurlaritzaren elkarlanari esker egi bihurtu direla nabarmendu du, “gure kasuan Errenterian dagoen eskaintza osatzera datoz”. Izan ere, gazteentzako etxebizitza komunitarioa du martxan Udalak, baita alokairu bati erantzuteko diru laguntzak ere, baita gazteei begira.
Autogestio energetikoa
Zuzkidura etxebizitza guztiek autogestio energetikorako sistema dute. Horri esker, bizikidetza unitate bakoitzak uraren eta berokuntzaren kontsumoak kontrola ditzake gailu baten bidez. Eraikinak gas galdarako sistema zentralizatua dauka eta energia berriztagarriekin osatu dute estalkian dauden plaka fotovoltaikoen bidez.
Adjudikazio prozesua
Prozesuan sartzeko izena emateko epea astelehenean zabaldu zuten. Parte hartu ahal izateko ezinbestekoa da 36 urtetik beherakoak izatea, Donostialdea-Bidasoa Beherako eremu funtzionalean alokairuko etxebizitzaren eskatzaile gisa alta emanda egotea Etxebideko Etxebizitza Eskatzaileen Erregistroan agindua argitaratu aurretik, Errenterian erroldatuta egotea, aurreko bi urteetan etxebizitzarik jabetzan ez izatea ezta azalera eskubiderik edo gozamen eskubiderik ere, eta 3.000 eta 39.000 euro arteko diru sarrera haztatuak izatea 2019ko errenta aitorpenen ekitaldian. Gutxieneko diru sarrerak ez egiaztatzeko aukera izango dute mugikortasun urriko desgaitasuna edo desgaitasun psikikoa duten pertsonek, genero indarkeriaren biktima diren emakumeek, edo etxebizitza eskubide subjektiboa duten pertsonek.
Informazio gehiago, hemen.
