Onddo espezie mehatxatuentzako eremu egokia da Añarbeko Erreserba
Bertan aurkitutako bederatzi espezie mehatxatuta daude, eta lau exotikoak dira. Perretxiko eta onddoen gaineko ikerketa berriak eman ditu datu horiek.
Egindako ikerketa ezberdinen bidez, 368 onddo espezie identifikatu dituzte. Argazkia: Aranzadi Ikerketa berria egin du errenteriako Udalak añarbeko erreserbako perretxiko eta onddoen floraren gainean. 2000 hamarkada hasieran, eta 2022an ikertutako bildumari jarraipena eman dio. aurreko inbentarioak eta egungo lana kontuan hartuta, 368 onddo espezie daude Añarben; horietako 114 2022an egindako ikerketan aurkitu zituzten. Datu gehiago eman ditu udalak, identifikatutako espezie guztien artetik bederatzi mehatxatutakoak dira, eta lau, exotikoak.
Datuak garrantzitsuak direla esan du udalak, izan ere, horrek erakusten baitu Añarben orain arte ezaguna zen mikrobiotaren %31 inguru handitu dela, “halaber, Añarbe ingurua interes handiko eremua dela gelditu da nabarmen onddo espezie kritikoen eta mehatxatuen zerrenda gorrietan dauden espezie batzuk kontserbatzeko”.
Onddoen 80.000 espezie ezagun inguru dago, eta 1.000.000 baino gehiago izan daitezkeela uste da. Gehienak mikroskopikoak dira, eta une eta baldintza jakinetan egitura ikusgarriak eta forma zehatzekoak sortzeko gai dira. Mota honetakoak, onddo makromizetoak dira.
Udalak finantzatutako proiektu berriaren helburua Añarbeko baso inguruko onddo makromizetoen inbentarioa egitea da, “bertan dagoen ezagutza zientifikoaren hutsunea betetzeko”. Bioaniztasun fungiko handiena duten eremuak ezaugarritu nahi ditu udalak, babesa handituz; espezieen kontserbazioaren ikuspegitik interesgarriak diren espezie gfungikoak aztertzea eta baloratzea, exotiko inbaditzaileak identifikatuz. Horrela Europako espezie mehatxatuen zerrenda gorrietan (IUCN egon daitezkeen espezieen jarraipena egiteko proposamena egin ahal izango da.
Ikerketan INaturlist plataforma erabili dute, Añarbe-Fungi online proiektua sortuta. Atera dituzten datu guztiak, gainera, GBIF Global Biodiversity Information Facility bioaniztasun datu basera pasatzen ari da Aranzadi Elkartea, komunitate zientifikoaren eskura jartzeko.
Ikerketatik ateratako beste ondorioa da Añarbeko HOMeko Herri Onurako Mendiko baso eta ibai habitaten kontserbazio ekologikoaren egoera ez dela batere egokia, erreserba gisa proposatutako eremuan baso naturalen mozketa duela hamarkada batzuk eten bazen ere.
