Atxiloketa bat izan da Oiartzunen indarkeria matxistagatik
Jaien atarian, Oiartzungo Feministen Asanbladak deituta, kaleak hartu behar izan dituzte berriro herritarrek bortizkeria matxista arbuiatzeko.
Dozenaka bizilagunek egin zuten bat atzo Oiartzungo Feministen Asanbladak deituriko elkarretaratzearekin. 
Iragan larunbatean atxiloketa bat izan zen Oiartzunen indarkeria matxistagatik, Oiartzungo Feministen Asanbladak aditzera eman duenez. Testuinguru gordin horretan, eta xanistebanen atarian, berriro kaleak hartu behar izan dituzte bizilagunek genero bortizkeriaren aurkako arbuioa ikusarazteko.
Atzo izan zen elkarretaratzea, 19:30ean, plazan. Bertan, biktimari babesa eta elkartasuna adierazi zieten asanbladako kideek, eta indarkeria estrukturala errotik eraldatzea ezinbestekoa dela errepikatu zuten berriz ere: “Azken hilabeteetako muturreko gertaerek eta larunbatean Oiartzunen bizitakoak, beste behin agerian utzi dute sistema patriarkal honetan emakumeok* pairatzen ditugun indarkeriak”.
Atzo, gainera, Getxon adingabeko neska baten kontrako erasoa salatu zuten, eta aipamena egin zioten eraso horri ere, bortizkeria estrukturalaren erakusle. “Nazkatuta gaude!”, errepikatu zuten, “behin eta berriro erasotuak izateaz nazkatuta, gizartearen erdia bezain libre ez izateaz nazkatuta, bizitza bizigarriak bizitzeko aukera ez izateaz nazkatuta! Nahikoa da!”.
Gizartearen antolaketa patriarkalak uneoro ahalbidetzen du indarkeria matxista jendartean hedatzea. Askotarikoak dira emakumeek* egunerokoan pairatu behar dituzten erasoak. Lantegietatik hasi, supermerkatuetatik igaro, festa girora hedatu eta etxeen barnealdeetara arte.
Horren jakitun, eta 2023ko Oiartzungo jaien atarian, bihar 18:30ean herriko plazan izango den agerraldi feministari aurrea hartzeko probestu zuten atzoko hitzordua ere: “Beti bezain adi eta tentuz ibiliko gara, espazio seguruak sortzeko lanean ibili gara eta gaude, baina guztion ardura da hori. Jaietan ere ez dugu inolako erasorik onartuko eta ozen diogu: erasotzaileak, aurrean izango gaituzue!”.
“Horregatik, beharrezkoa da herri mugimendutik eragiten jarraitzea”, bukatu zuten, “feminismoa bazter guztietara hedatzea”. Hori ezin du mugimendu feministak bakarrik egin, erakundeen inplikazioa beharrezkoa da, eta horretxegatik dei egin zieten baita atzo ere arduradun politiko zein administrazio publikoei dagokien ardura beregain hartu eta “lehenbailehen” premiazko neurriak ezar ditzaten, “egoera iraultzeko”.
Haiek, bien bitartean, ez dira geldituko horren esperoan besoak gurutzaturik. Kaleak hartzen jarraituko dute, erasotuei babesa eman eta erasotzaileak salatzen, bizitza bizigarriak eraikitzen. “Feminismoak sistema patriarkala suntsitu arte”.
