Ate joka dira Inauteriak
Inauterietako jai batzordeak aurkeztu du ondu duen egitaraua. Bihartik hasi eta hilaren 13ra arte izango da zer gozatu herrian.
Inauterietako Jai Batzordeak egitaraua aurkeztu du. Argazkia: Herri Bizia Ate joka dira Inauteriak. Atzo arratsaldean aurkeztu zuen Inauterietako Jai batzordeak herritar denei begira ondu duen egitarau zabala eta askotarikoa. Kaldereroen eskutik helduko da festa giroa bihar, eta hilaren 13an bukatu da mozorro jaia, sardinaren ehorzketarekin. Tartean, hamaika ekintzez zipriztindutako atrakzio parke erraldoi izango da Errenteria-Orereta.
Urtero moduan, aurten ere udaletxeko arkupetan photocalla izango da, eta familia jolasek, tailerrek, konpartsen desfileak ez dute huts egingo. Arrakasta handia deun herri bazkaria ere egingo dute, eta horren harira, gogora ekarri du batzordeak txartelak oraindik ere eros daitezkeela Lekuona Fabrikako kantinan eta Xenpelar Kultur Dendan. Oarsoirriak taldearen familia eta kuadrillen kalejaia eta erraldoi eta buruhandien konpartsa ere ez dira faltako.
Herriko Plazan egingo du eztanda mozorro festak hilaren 8an, ostegunarekin, 19:45ean Asteme, Oilarqueen eta Katuko udaletxeko balkoira irteten direnean. Ondoren Azeri dantza koloretsuaren umoreak hartuko du txanda.
Konpartsek aurkezpena egingo dute Lekuona Fabrikan 20:30ean, eta hiru modu izango dira hura ikusteko. Ikuskizuna presentzialki jarraitzeko aukera izango da Lekuona Fabrikan. Horretarako larunbatean —hilak 3— jarriko dituzte sarrerak salgai euro batean Lekuona Fabrikan, edo online. Bestetik zuzeneko proiekzioa ikusteko beta izango da pantaila erraldoi bidez Niessen Kulturgunean. Horretarako gonbidapena behar da, online eskuratuta edo Lekuona Fabrikako harreran. Azkenik, emanaldia streaming bidez jarraitzeko aukera izango da. Horretarako egin klik hemen.
Egitarau osoa datozen egunetan izango da eskuragarri udal eraikinetan eta turismo bulegoan, eta dagoeneko Herri Biziaren webgunean kontsulta daiteke. Egitaraua kontsultatzeko klikatu hemen.
Inauterietako argazkien bilduma egunero argitaratuko dute Herri Bizia webgunean.
