Eguzki Borda gaztandegiak bisita antolatu du
Hilaren 18an, igandearekin egingo du gaztagintzaren eta arkumeen sekretuak azaltzeko bertaratzen direnei.
Eguzki Borda gaztandegian bisita gidatua egingo dute. Bisita gidatua egingo du Eguzki Borda gaztandegiak hilaren 18an, igandea, Gipuzkoako Parketxe Sareak antolatuta. Idiazabal jatorri deiturako gazta egiten dute bertan ardi latxaren esnearekin. Zamalbide auzoan kokatua dago gaztandegia, San Marko gotorlekuaren inguruan, Lau Haizeta parkean.
Ardiak ukuiluan izaten dira urritik ekainera arte, eta ekainetik urrira, berriz, Aralarren izaten dira, hango larreetan bazkatzen. Azaro abenduan jaiotzen dira arkumeak, eta gazta, urtarrila eta ekaina bitartean egiten dute, oso garai egokia da beraz, ardiak eta arkumeak ukuiluan ikusi eta gazta egiteko prozesua ezagutzeko.
Josu Oiartzabal, gaztandegiko arduradunak gidatuko du, eta bisitariei, ardien elikadurarekin eta zainketarekin lotutakoak azalduko dizkie. Hala, arkumeak gertu-gertutik ikusteko aukera izango dute, eta ardiei bazka emango diete. Ondoren gazta egiteko prozesua azalduko die Oiartzabalek, eta bukatzeko, Eguzki Bordan egindako Idiazabal gazta dastatzeko aukera izango dute.
Goizez izango da bisita, 11:00etan eta ordu eta erdiko iraupena izango du. Parte hartzeko, izena eman behar da aurretik posta elektronikoz (egin klik hemen) edota bi telefono zenbaki hauetako batera deituta: 943 49 50 69 edo 688 89 50 68. Horietan, halaber, informazioa eskatzeko aukera izango da.
Bisitaren prezioa, 12 eurokoa da helduentzat eta 6 eurokoa 3-12 urte arteko haurrentzat. Euskaraz emango dira azalpenak.
