Euskarazko zerbitzua hobetzeko bidea hasi dute
Udalak eta Bai Euskararik herriko establezimenduetan euskararen erabilera indartzeko bidea hasi dute, merkatariekin elkarlanean.
Egitasmoa iragartzeko euskarria. Lezoko komertzio, ostalaritza gune edota entitateen bezero euskaldunei begirako zerbitzua hobetzeko asmoz lankidetza hasi dute Lezoko udalak eta Bai Euskararik. Iker Salaberria Euskara zinegotziak adierazi du tokiko establezimenduek eskaintzen duten gertutasun eta konfiantzaren barruan, zerbitzua euskaraz ere eskaintzea dagoela: “Zerbitzuak euskaraz eskaintzen dituzten merkatariek euskaldunoi kalitate hobeagoa duen zerbitzua eskaintzen digute”. Zerbitzuen hobetze hori modu errazean egikaritzeko aukera dagoela zehaztu du udalak, eta gune bakoitzaren mailaren araberako Bai Euskarari ziurtagiria jasoko dute. “Euskal Herriko 1.300 entitate edo komertzio inguruk dagoeneko badute Bai Euskarari ziurtagiria, eta Lezoko entitateei ere urratsa egiteko gonbita luzatu nahi diegu”, esan du Salaberriak.
Bide horretan jada lanean hasi dira. Lehenik eta behin, Lezokoak merkatari, ostalari eta zerbitzu elkartekoei egitasmoaren berri eman diete. Datozen egunetan herriko establezimenduak bisitatuko ditu Bai Euskarariko teknikari batek, egitasmoaren berri zuzenean eman eta parte hartzea sustatzeko.
Egitasmoarekin bat egiten dutenek beste hitzordu bat izango dute Bai Euskarariko kidearekin: euskararen diagnostikoa egingo diete ordu eta erdi baino gutxiagoko bilkuran. Diagnostikoa eginda, entitateen jardunean euskararen erabilera areagotzeko helburuak zehaztuko dituzte, baita baliabideak eskaini ere. Udalaren eta Bai Euskararen arteko lankidetzari esker, zerbitzu horiek bi urtez (gutxienez) doan izango dira.
Diagnostikoetan jasotako emaitzen arabera, entitateak hiru mailatan sailkatuko dituzte:
- Zerbitzua eta lana euskaraz: euren bezeroari zerbitzua euskaraz eskaintzen dieten, eta gainera, euren lan-jarduna euskaraz garatzen duten entitateak.
- Zerbitzua euskaraz: euren bezeroari zerbitzua euskaraz eskaintzen dieten entitateak.
- Euskararen bidean: zerbitzua euskaraz eskaintzera iritsi ez arren, horretarako bidea abiatu duten entitateak.
Egitasmoarekin bat egiten dutenek, euskaldunen hizkuntza eskubideak errespetatzeaz gain, zerbitzu hobea eskainiko dutela ziur da Euskara zinegotzia: “Ziurtagiria eskuratzea bezero berriak lortzeko aukera ere izan liteke. Batu gaitezen euskararen mapara!”.
