Trafikoan eragina izango dute Inauteriek
Trafikoan eta garraioan hainbat aldaketa egingo dituzte asteburuan, Inauterien harira.
Inauteriak direla eta, asteburuan udalerriko eremu handi bati eragingo dioten trafiko neurri batzuk ezarriko ditu udalak. Igandean, 11:00etatik 15:00etara egingo dute desfilea. Ibilbidea, honakoa: Pontika-Arramendi pasealekua, Errioxako biribilgunea, Tulle, Mª de Lezo, Xenpelar, Biteri, Nafarroako biribilgunea, Nafarroako etorb., Galiziako biribilgunea, Nafarroako etorbidea, Alameda, Santa Klarako biribilgunea, Gabierrota biribilgunea.
Desfileari begira hilaren 10eko (larunbata) 21:00etatik igandeko 15:00etara ezingo da ibilgailurik izan aparkatuta ondoko kaleotan: Tulle, Maria de Lezo, Xenpelar, Biteri kaleetan, Nafarroa etorbidean, Galizia eta Santa Klara biribilguneen artean, ezta 4 eta 6 zenbakien arteko Alaberga eremuan ere, ekitaldiak irauten duen bitartean taxi geltokia lekuz aldatuko delako.
Halaber, igandean, desfilea hasi baino 30 minutu lehenago ondoko guneak itxiko dituzte: Beraun eta Arramendi arteko bidegurutzea, Arramendi pasealekua, Errioxako biribilgunea.Gainera, desfileak irauten duen bitartean Erdigunetik ez zirkulatzeko eskatu die gidariei udalak, eta bide alternatiboak erabiltzea gomendatu du, Gi-636 auzoetara sartzeko.
Desfilearen gunean eta ondoko kaleetan—Koldo Mitxelena plaza, Pablo Iglesias, Biteri 35, Segundu Izpizua, Morrongilleta 4— dauden garajeetan aparkatzen dutenek ezingo dute desfilea egiten den orduetan inguru horretatik zirkulatu. Santa Klara biribilgunetik Gabierrotako biribilguneraino Nafarroa etorbidean aparkatzen dutenek ere ezingo dira gunera sartu edo bertatik atera.
Trafiko mozketak ere eragingo dio garraio publikoari, E01 Pasai Donibane-Donostia, E02 Oiartzun Donostia, E03 Pasaia.-Donostia poliklinika eta E27 Hondarribia-Donostia lineei zehazki. Diputazio plaza, Zumardia, Gabierrota eta Lartzabal geltokiak kendu eta Altamira, Arragua eta Lintzirinera eramango dira.
Hiri barruko garraio publikoaren geralekuak, bertan behera geratuko dira, eragindako kaleak trafikoarentzat libre gelditu arte.
