12 familia kaleratu nahi dituzte portuak eta Euskal Trenbide Sareak
Trintxerpeko Herrera kalean bizi dira maizterrak. Etxebizitzen gainean trenbideak sortuko dituzte, eta egoera salatzeko agerraldia egingo dute astelehenean.
1960. hamarkadan, Pasaiako Portuak Trintxerpeko Herrera kaleko hainbat bizitoki eskuratu zituen jabetzan, eta orduan langile familiei esleitu zizkien, alokairuan. Ordutik, sei hamarkada luze daramate Herrera kaleko 10. eta 11. portaleko familiek bertan bizitzen, eta orain, bada, Pasaiako Portuak eta Euskal Trenbide Sareak bizilagunak kaleratu nahi dituzte. Izan ere, etxebizitzen ondotik igaroko diren trenbideak sortuko dituzte, merkantziak garraiatzeko.
Bizilagunek etxebizitzon kudeaketan egon diren hainbat tira bira salatu dituzte. Jatorrizko “titularrak” zendu ondoren, haien oinordekoek urte luzez alokairu tasa ordaintzen jarraitu dute, batetik; portuarekin hainbatetan saiatu dira elkarrizketa izaten bestetik, maizterrak etxebizitzak erosi eta jabe bihurtu nahi dutelako.
Hori dela eta, datorren otsailaren 12an, astelehenean, arratsaldeko 16:30ean agerraldia egingo dute bizilagunek eta Oarsoaldeko Etxebizitza Sindikatuak, euren egoeraren berri emateko asmoz. Hori gutxi ez eta azken asteetan, portuak ekainerako etxeak utzi behar dituztela jakinarazi die bizilagunei, bat batean. Jakinarazpenak ezustean harrapatu ditu familiak, aurrez ez baita inolako abisurik egon. Are, adierazi dute portuak trukean ez diela inolako kalteordain edo alternatibarik eskaini.
