Bigarren bisita antolatu du Eguzki Borda gaztandegiak
Otsailaren 18an zuten jarria lehen hitzordua. Izen emateak berehala bete ziren, eta, honenbestez, bigarren saioa egingo dute hilaren 25ean.
Errenteria-Oreretako Eguzki-borda familiako gaztandegian Idiazabal jatorri-deiturako gazta egiten dute, ardi latxaren esnearekin. Datorren otsailaren 18rako, “Gaztagintzaren (eta arkumeen) sekretuak” deituriko bisita gidatua antolatu zuten. Izen ematea ireki zuten, eta berehala bete zen kupoa. Hori dela eta, astebete beranduago, hilaren 25ean, beste bisita bat antolatuko dute.
Gaztandegia Zamalbide auzoan dago, San Marko gotorlekuaren inguruan. Izena emateko, helbide elektroniko honetara bidali behar da mezua. 3 eta 12 urte arteko umeek 6 euro ordaindu beharko dituzte, eta helduek, 12. Azalpenak euskaraz emango dira.
Bi saioetan, Gipuzkoako Parketxe Sareak egingo ditu antolaketa lanak. 11:00etan hasiko da, Josu Oiartzabal gaztandegiko arduradunak gidatuta. Ordu eta erdiko bisitan zehar, parte hartzaileek arkumeen zaintza eta elikadurarekin zerikusia duten alderdiak ezagutuko dituzte.
