E15 autobus linearen etorkizuna, kezka iturri herritarrentzat
Hitzaldia egin dute auzo elkarteek eta Duintasunak auziaren gainean Ekialdebuseko Langileen Batzordeko presidentearekin. Moldatutako proiektuarekin «murrizketak» ezarri dituztela salatu du hark.
Beraungo jubilatuen elkartea lepo, atzoko hitzaldia entzuteko. Argazkia: Duintasuna elkartea Beraun eta Donostiako ospitaleak lotzen dituen E15 linearen etorkizunak kezka eta egonezina sortu du herritarren artean. Aldundiak eta Errenteriako alderdi sozialistak Beraunek Ospitaleekin lotuko duen autobus zerbitzua izango duela baieztatu dute, akats bat dagoela esleipenera ateratako proiektu berrian, eta horregatik ez dela azaltzen Beraun OR07 linea berriak izango dituen geltokien artean. Gipuzkoako Aldizkari Ofizialean argitaratutako aldatutako proiektuan ez da geltokirik azaltzen Beraunen linea horren zerbitzuaren barruan, eta gobernu taldeak ere hala salatu zuen hiri barruko autobus zerbitzuaren balorazioa egiteko agerraldian.
Gertatzen ari denari argia eman nahian, hitzaldia egin zuten atzo auzo elkarteek eta Duintasuna pentsiodunen elkarteak. Hizlaria, Txema Gaztelumendi Ekialdebuseko langile batzordeko presidentea izan zen. Asteartean hitz egin zuen hitza-k harekin. Ahoan bilorik gabe mintzatu da: «Proiektu berriak murrizketa larriak suposatuko ditu autobus zerbitzuan, Beraunen, Errenterian, eta beste herrietan ere». Aurreproiektu bat izan zela aurretik, eta han E15 —Beraun eta ospitaleak lotzen dituen linea— eta E05 —Beraun eta Donostiako Gipuzkoa plaza lotzen dituena— mantentzen zirela azaldu du: «Prozesu guztia eginda, enpresek beraien proposamenak aurkeztu behar zituztenean, gelditu egin zuen proiektua aldundiak, akatsak zeudela argudiatuta. 2023ko urtarrilean izan zen hori, eta aurreproiektua desagertu egin zen». 2023ko azaroaren 29an, aldundiak moldatutako proiektua aurkeztu zuela azaldu du Gaztelumendik: «Moldatutako proiektu horri ezin zaio alegaziorik egin. Beraungo E-15 desagertu egiten da, eta E05 linearen zerbitzua %25 murrizten da. Izan ere, gaur egun 15 minutuko frekuentzia du zerbitzu horrek, eta proiektu moldatuan, berriz, 20 minutukoa. Murrizketak dira. Beraunen bezala, Oarsoaldeko eta Bidasoko beste zerbitzu eta lineetan ere ezarri dituzte».
400 erabiltzaile eguneko
Datu gehiago eman ditu Ekialdebuseko langileen ordezkariak: 400 lagunek erabiltzen dute egunero E15 autobus linea. «Askoz gehiago dira E05 linea erabiltzen dutenak, eta frekuentzia murriztuta, kaltetuta aterako dira, zalantzarik gabe». Berriro esan du proiektuaren atzean «murrizketak» direla: «Beraungo bi linea horiei eragiten diete, baina Pasai San Pedron 20 eta 26 lineak desagertuko dira, Pasaiatik eta Errenteriatik ezingo dugu joan zuzenean Bidasoko Ospitalera edota Endaneara, eta Hondarribitik Errenteriara joateko gutxienez 15 minutu gehiago beharko dira, Irun guztia pasa beharko delako».
Irungo auzoei ere egin die erreferentzia Gaztelumendik: «Zerbitzurik gabe geldituko dira Belaskoenea, Anaka, Puiana, eta Urdanibia. Zentrora joan beharko dute hango biztanleek».
Auzo elkarteek eta Duintasunak, bestalde, moldatutako proiektuari berraztertze errekurtsoa jarriko diotela jakinarazi dute. Egungo E15 linea bere horretan mantentzeko eskatu diote Diputatuen Kontseiluari, «horretarako onartu duen moldatutako proiektuan egin beharreko aldaketak eginda».
Atzo egindako hitzaldiarekin “pozik” azaldu dira Duintasuna eta auzo elkarteak. Izan ere, lepo bete zen erretiratuen egoitza eta bertaratutako herritar asko kanpoan gelditu behar izan zuten leku faltarengatik.
