Herio bidaia gozoena
Ustez zazpi ardi lapurtu eta hiltzearen errudun izendatu dute gaur, berriz ere, Trapujale. Herritarrak alboan izan ditu, ordea.
Inauteriak bitartean ustez zazpi ardi lapurtu eta hiltzeagatik Herio Bidaia egitera, eta igitaiaz burua moztera kondenatu dute gaur arratsaldean Trapujale. Erre egin dute haren burua. Azken urteetako joera (betikoa finean) mantendu du epaileak: Marinazkaneren eta Zirikuen testigantzak ontzat eman ditu, eta herritarrenak eskasegiak izan dira Trapujale salbatzeko. Manuela herritarrarena tartean. “Trapujaleren lagunek ez dute balio lekuko bezala”, esan du epaileak. Herio bidaia, ordea, gozo joan da. Herritarrak, beti bezala, alboan izan ditu Trapujalek. Espero dute datorren urtean itzuliko dela. Hala bedi.
“Trapujale errudun!” oihukatu dutenak askoz gutxiago ziren “Trapujale errugabe!” aldarrikatu dutenak baino. Baina Zirikuek zarata handiago atera dute. Zarata gehien egiten dutenek, batzuetan, izaten dute ustezko arrazoia. Inauterietako pertsonaia jatorra erretzerakoan, txorizo otartekoak eta ardoa atera dira haren gorputzetik. Haurrek gozatu dituzte, tamainan. Gozo joan dira haiek ere etxera.
Trapujaleren epaiketarekin gaur bukatu dira 2024ko Lezoko inauteriak. Gozotik asko izan dute. Ostegunzuritik gaurko Asteartebeltzera arte askotarikoak izan dira lezoarren gozamenerako antolatutakoak, eta horiek egoki joan izanaren sekretua bakarra izan da: parte hartzea. Eguraldiak asko-asko ez du lagundu (hainbat jarduera aldatu edo bertan behera utzi behar izan dira), baina alerta laranjek eta horrelakoek ez dute guztiz lausotu lezoarren festarako sena. 2025ean Trapujale itzuliko da; beraz, inauterien ilusioa ere bai.
Jarraian, gaur arratsaldeko hainbat irudi eta bideoa.
