Lapurdira, beste 700eko bat egitera
Iganderako prestatu du Xoxolur Mendi Klubak hurrengo irteera. Izena emateko epea ostegunera arte da zabalik.
Xoxolurrekoak, urtarrilean Zaria mendira egindako txangoan. Sasoiko bosgarren irteera Lapurdira egingo du Xoxolur Mendi Klubak. Hilaren 18rako ezarri dute hitzordua: Mondarrain mendiari (749 metro) kosk egingo diote Lezoko mendizaleek. Izen emate epea zabalik da, ostegunera arte (hilak 15) Orki tabernan fisikoki, eta Xoxolurren posta elektroniko helbidera mezua bidalita telematikoki. Gazteen izen emate kuota 8 eurokoa da, 10ekoa helduena. Oharra: izen emateetan minimo batera iristen ez bada, plana aldatuko lukete, gertuko mendi batera joango lirateke.
Zazpi urte bete ditu ikasturte honetan Xoxolurrek. Horregatik, Euskal Herriko zazpi herrialdetako zazpi gain zapaltzea dute asmo, 700 metro ingurukoak horiek guztiak.
Behin izena emanda, kontuan hartzekoak: Lapurdi aldera igandeko 08:30ean dira abiatzekoak Ijurkotik; bi motxila eraman behar dira, bat bidea egiteko baliagarri diren osagaiekin, eta bestean aldatzeko arropa nahiz bazkaria gordeko lirateke. 2-3 orduko martxa da Lapurdikoa, eta umeen erritmoa errespetatuko da. Gaina egin ondorenean, inguruko herri bateko estalitako frontoian bazkaldu, eta jolasei ekingo diete.
