"Palestina desagerraraztea da estatu sionistaren helburu behinena; genozidioa da"
Eskaera argia egin die Orereta Palestinarekin Herri dinamikak Euskal Herriko zein nazioarteko erakundeei, "ez zaitezte genozidio honen konplize izan, are gutxiago gure izenean".
Orereta Palestinarekin Herri dinamikak deituta, dozenaka eta dozenaka lagun atera dira kalera. Dozenaka eta dozenaka herritarrek egin dute bat Orereta Palestinarekin Herri dinamikak gaur arratsaldean deitu duen manifestazioarekin. Erresistentziaz Palestina askatu leloa zuen pankartaren atzean, Herriko Plazatik abiatuta, erdialdeko kale nagusiak zeharkatu ditu Palestinaren kontrako genozidioa salatu eta Palestinako herriari elkartasuna adierazteko manifestazioak. Tartean, Aralar plazatik igaro da; Errenteriako Udalaren iniziatibaz eta Giza Eskubideen Jardunaldien barruan, Eva Mena artistak Palestinari keinu egiten dion murala bukatu berri du plaza horretako pareta batean.
Aipatzekoa da, Zumardiko taberna guztiek itxi dituztela ateak manifestazioak iraun duen bitartean. Herriko besteren batzuk ere bat egin dute.
Palestinaren aldeko eta Israelgo estatuaren aurkako oihuak entzun dira ibilbide osoan zehar, eta Palestinako bandera eta zapiek jantzi dute protesta.
Zumardian bukatu da manifestazio erraldoia. Txalapartaren doinuek hartu dute manifestazioa, eta luze jo du bukaera zumardiraino heldu den arte. Ondoren, Xenpelar Bertso Eskolako kide batek, ekarpena egin dio protestari, bertsotan. Txaloka erantzun dute bildutakoek. Orereta Palestinarekin Herri dinamikako kideek hartu dute hitza azkenik, euskaraz lehenik, arabieraz ondoren, eta gaztelaniaz bukatzeko, eta gogora ekarri dute 28.000tik gora palestinar hil dituela Israelek azken lau hilabeteetan, eta horietako asko eta asko, haurrak direla: “Gertakariek argi eta garbi adierazten dute, Palestina desagerraraztea dela estatu sionistaren helburu behinena”. Enegarrenez errepikatu dute, “genozidioa da”.
Gaitzespena Europako Batasunari, Ameriketako Estatu Batuei, Espainiako Estatuko Gobernuari eta Nazio Batuen Erakundeko erresoluzioei ere, baina baita Eusko Jaurlaritza eta Gipuzkoako Foru Aldundiari ere, “ez gara inozoak, badakigu zuen interes ekonomiko eta geopolitikoak lehenesten ari zaretela, Palestinako herriari eragindako sufrimendu eta bidegabekeriaren gaineko inongo erreparorik gabe”. Eskaera zehatza Euskal Herriko erakundeei, baita Espainiako Estatuko Gobernuari ere, “eten berehala Israelekin dituzuen harreman politiko, instituzional eta komertzial guztiak. Ez zaitezte genozidio honen konplize izan, are gutxiago gure izenean”.
Herritarrei ere eskaera zehatza egin die herri dinamikak, “norbanako gisa badugulako ardura”. Zentzu horretan boikoterako deia egin du, “Israelgo produktu eta enpresei, baita bestelako jatorria izan arren, okupazioa eta Palestinaren genozidioa zuzenean edo zeharka laguntzen dutenei ere. Boikot aktiboa horiei guztiei”.
Autodefentsarako eskubidea
1948an Israelek Palestinako lurrak okupatu zituenetik etengabeak izan direla Palestinarrek jasan beharreko erasoak ekarri dute gogora bukatzeko: “Lurren lapurreta, behartutako desplazamenduak, apartheida, sarraskiak, heriotzak, atxiloketak, torturak… “. Nazio Batuen Erakundearen 3070 erresoluzioaren bigarren puntuari egin diote erreferentzia: “Halako egoera batean edozein herrik autodefentsa eta erresistentzia eskubidea duela jasota du erresoluzio horrek. Hori da Palestinak herri bezala irauteko duen aukera bakarra”.
