Shakira ere izan da Trintxerpen
Kuadrillen poteoak eta Kitadelpare txarangak bazterrak alaitu dituzte gaur eguerdian. Konpartsen eta kuadrillen desfileak hartuko dio lekukoa poteoari, 17:00etan hasita.
Giro aparta jarri dute eguerdian Trintxerpeko kuadrillek poteoan. Ezin esan Trintxerpeko Inauteriek sonarik ez dutela. Shakira bera bertaratu da Pasaiako barrutira gaur eguerdian kaleak alaitu dituen kuadrillen poteoan parte hartzeko. Mozorroak nonahi, baita giroa ere, eta zerbait nabarmen utzi badute Trintxerpeko bizilagunek, irudimenik ez dutela falta izan da.
12:30ean abiatu da Serafin Esnaola plazatik kuadrillen poteoa Kitadelpare txarangak lagunduta, eta aurretik bertan ziren hainbat kuadrillak euren mozorro originalak erakusten. Talde batzuetan familiak osorik, haur eta guzti, eta denak gozatzeko prest.
Jai giroak ez du etenik izango, izan ere, arratsaldean, 17:00etan hasita, konpartsa eta kuadrillen desfilea izango da. Bihar arratsaldez ere egingo dute desfilea, ordu berean, eta bakailaoaren ehorzketarekin bukatuko dira Inauteriak. Hala ere, oraindik ere, asko dago gozatzeko.
Etxebizitzen afera, presente
Jai giroan murgilduta, baina aldarria ere presente izan da gaur eguerdian Trintxerpen. Herrera kaleko 10. eta 11. zenbakietako bizilagunak aterarazi nahi dituztela salatu dute eta informazioa banatzen aritu dira herritarren artean. Etxebizitza eraikina bota eta merkantzien trenbide bat eraiki nahi dute bertan Portuak eta Euskal Trenbide Sareak bertako bizilagunek eta Etxebizitza Sindikatuak salatu duenez.
Gaur, larunbata
- 17:00: Konpartsa eta kuadrillen desfilea. Ibilbidea: Gudarien plaza, Euskadi Etorbidea, Correos. Konpartsak: Txasiss, Show Time, Gurea, Fama eta Boveda.
- 19:00: Alargun Beltzak elektrotxaranga. Ibilbidea: Euskadi Etorbidea (Correos), Gudarien plaza, Serafin Esnaola.
- 21:00: Inauterietako Haur Jaia Karmengo Amako gimnasioan. Informazio gehiagorako jarri harremanetan Ekaitzarekin.
Bihar, igandea
- 17:00: Konpartsa eta kuadrillen desfilea. Ibilbidea: Euskadi Etorbidea, Correos. Konpartsak: Thamessis, Txasiss, Lezoko Eztandak, Show Time, Gurea, Boveda eta Fama.
- 19:30: Bakailaoaren ehorzketa. Ibilbidea: Azkuene, Euskadi Etorbidea, Portua.
