Gertu izan dute garaipena
Hibaikako ontziak txukun aritu dira oro har, Gipuzkoako Batel Txapelketaren laugarren jardunaldian.
Hibaikako Mutil Gazteen ontzia atzoko estropadan, Urumean. Argazkia: Liher Saiz Zarate Eskura izan zuten garaipena, baina hiru segundo pasatxoko aldeak Tolosaldearen ontziaren alde jarri zuen balantza. Bikain ari da Hibaika Arraun Elkarteko Gazte Mailako Mutilen ontzia, lehia bizian estropada guztietan Orion lortu zuen garaipena errepikatzeko. Atzo Urumeako uretan jokatutako Gipuzkoako Batel Txapelketaren laugarren jardunaldian, bigarren postuarekin konformatu behar izan zuten. Lehen ziabogan, Tolosaldea, San Pedro B eta Ur Joko aurretik zituen Errenteriako eskifaiak. Bigarrenean koska bat gora egin eta hirugarren denbora onena egin zuen Hibaikak kategoria horretan San Pedro B-ren denbora hobetuta. Hirugarren ziabogan, 12 segundoko abantaila zuen Tolosaldeak, eta bost segundokoa Ur Jokok, azken bueltan baina, gogor estutu zuten Hibaikakoek eta alde hori hiru segundo pasatxora murriztu, eta bigarren sailkatu, Ur Jokoren denbora hobetuta.
Jubenil Nesken kasuan, laugarren sailkatu zen Hibaika B ontzia San Juan, Tolosaldea B, eta Hernani A-ren atzetik. Haiek ere, oso txukun sailkapen taularen goiko aldean azken jardunaldian ere eta hirugarren sailkatu zen Hernani A ontzitik oso-oso gertu. Hibaikaren A ontzia azkena sailkatu zen.
Promesa Nesketan denbora onena Hibaika B ontziko eskifaiak egin zuen, eta laugarren sailkatu, San Pedro, San Juan, eta Tolosaldea A ontzien ondotik. Hibaika A, hamalaugarren sailkatu zen, Hibaika C hemeretzigarren, eta Hibaika D hogeigarren. Promesa emakumeak ere bikain atzoko saioan.
Mutiletan ez zuten lortu aurreko hiru estropadetako mailari eustea lehen ziabogan arazoa izanda, istriborretik eman zuten ziaboga eta zuzentzeko denbora behar izan zuten. Hala ere, burua hotz, estropadan mantendu ziren, eta bigarren luze eta ziaboga dotorea egin zuten, baita azken luzea ere. Atzoko jardunaldian azkenak sailkatu ziren.
Haur mailan, gogotsu dator harrobia. Nesken ontziak zazpigarren egin zuen atzoko jardunaldian; mutilak, laugarren sailkatu ziren, San Pedro, Zarautz A eta Zarautz B-ren ondotik.
Emaitza guztiak ikusteko, egin klik hemen.
