Pasaiako lau barrutietan, Korrika Batzordeak
Gaur Antxon, etzi Trintxerpen, 28an San Pedron eta martxoaren 1ean Donibanen izango dira batzordeak. Txikiren bakarrizketa, 29an Antxon.
![](https://oarsoaldea.hitza.eus/site/files/2024/02/korrikabatzordea-donibane.png)
Korrikaren etorrera behar bezala prestatzeko bilkurak abian dira Pasaiako lau barrutietan. Jada denetan lehen Korrika Batzordeak egin dituzte, eta datozen egunetan AEKren iniziatiba erraldoiak herrian behar bezalako harrera izan dezan lanean jarraituko dute. Horretarako mahaiak Korrika Batzordeak dira.
Honakoak dira lau barrutietako batzordeen deialdiak:
- Antxo. Gaur (hilak 20, asteartea) 17:45ean Txirrita AEKn.
- Trintxerpe. Etzi (hilak 22, osteguna) 20:00etan Terranova kaleko 3. zenbakiko lokalean).
- San Pedro. Hilaren 28an (asteazkena) 18:00etan ikastolan.
- Donibane. Martxoaren 1ean (ostirala) 19:30ean Juanba Berasategi Kulturguneko auditoriumean.
Korrika aberastu nahi duten den-denei horietara agertzeko deia egin die AEK-k.
Korrika Kulturala
Batzordeen lanarekin paraleloki, Korrika Kulturalaren barruko ekitaldiak egiten hasi dira herrian eta eskualdean. Oarsoaldeari dagokionez, igandean 23. Korrikaren kultur ekitaldi nagusia, eskualde izaerakoa, jasoko du Oiartzun Landetxe aretoak igandeko (hilak 25) 19:00etan: Badon ikuskizunaz gozatzeko aukera bakarra izango da.
Pasaiari dagokionez, Antxon umorezko bakarrizketa eskainiko du JOn Martinez Txiki monologistak. Hilaren 29ko (osteguna) ezarri dute hitzordua, 19:30ean eta Kultur Etxean. Emanaldiaren gaineko xehetasunak eman dituzte Antxoko Txirrita AEK-ko kideek: “Emanaldi berezia izango da, zalantzarik gabe. Txiki leku berean aritu zen 20. Korrikan, 2017an, eta aurtengoan antxotarrak agurtzeko aukera izango du: hogei urtez harat-honat ibili eta gero, erretiroa hartuko du Antiguako artistak oraingo bira bukatutakoan. Korrikak zabaltzen dituen balioekin bat egiten du Txikik; hasiera-hasieratik euskaraz jardun da. Bakarkako lan zaila, baina aldi berean polita. Antxotarron eta ingurukoon esker ona jasoko du hilaren 29an Txikik, ziur!”.