Auto klasikoena izan da errepidea
Igor Amado eta Kukul Deniz izan dira rallyaren irabazleak, 1988ko Ford Fiesta auto batekin. 124 ibilgailu klasikok hartu dute parte.
Igor Amado eta Kukul Deniz irbazleak. (Argazkia: MG) Ibilgailu klasikoena izan zen errepidea larunbatean. Euriak eta hotzak ez zuten saihestu aurtengoan ere, Don Bosco zeharkaldiak parte hartze zabala izatea. 124 auto klasikok egin zuten bat, eta antolatzaileak diren Don Bosco Institutuak eta RACVN Real automovil Club Vasco Navarrok balorazio ezin hobea egin dute. H saileko (1980ko hamarkada) Igor Amado eta Kukul Deniz izan ziren rallyaren irabazleak 1988ko Ford fiesta auto batekin.
Rallyan parte hartu zutenek 119,41 kilometroko ibilbidea osatu zuten hiru tramu erregulatuetan Guadalupe-Jaizkibel, Etumeta, eta Goiatz-Urraki. Lehiaketatik kanpo ibilbidea osatu zuten parte hartzaileek berriz, 103 kilometroko ibilbidea egin zuten Errenteria eta Azpeitia lotuz.
Bigarren sailkatuak, Rafa eta RUben Benavente izan ziren 1989 urteko Lancia Delta HF Integrale 16 auto batekin; eta hirugarren, orokorrean, Ion de la Loma eta Lander Gurmendi, 1991ko Coupe GT auto batekin.
Don Bosco Ibilaldiko antolatzaileek Ander Soliño, Iñaki Gonzalez eta Rafa Esparza omendu zituzten. Soliño eta Gonzalez Don Boscoko ikasle ohiak ziren eta abenduan zendu ziren auto istripuan GI-636 errepidean, Errenteria-Orereta eta Lezo artean. Soliño, gainera, automobilismo zalea zen, eta iaz ibilaldian hartu zuen parte bere Ford Orionarekin, 129 zenbakiarekin.
Bestalde, Esparza RACVNko langilea eta Don Boscoko Ibilaldiko eta automobilismoko beste proba batzuetako antolatzaile izan zen. Iaz zendu zen, eta hura ere gogoratu zuten larunbatean.
Ondoko argazkiak Don Bosco Institutuarenak dira.
