[Lezoarren sailkapenarekin] Lezo-Jaizkibel: 75 lezoar iritsi dira helmugara
Atzoko lasterketan helmugaratu ziren 333 korrikalarietatik ia laurdena Lezokoak izan ziren. Nola ez, txalo zaparrada handienak haientzat izan ziren.
Era askotako emozioz beterikoa izan zen atzoko Lezo-Jaizkibel mendiko lasterketaren hamargarren ekitaldia. Horietako bat, lezoarren partaidetza handiarena: helmugaratu ziren 333 korrikalarietatik, 75 lezoarrak izan ziren. Hau da, 14 kilometroko karrera bukatu zutenen ia laurdena (%22,5) herrikoak izan ziren, eta horrek helmugan nahiz bidean txalo zaparrada festa eragin zuen. Korrikalari guztiek izan zituzten ikusleen animoak, baina normala denez, herrikoek gehiago.
Lasterketaren bezperatan antolatzaileek HITZAri esan zioten herrian zeharo errotua dagoen lasterketa dela Lezo-Jaizkibel. Eta ez bakarrik boluntarioen eta oro har herritarren lanagatik. Lasterkarietako asko ere herrikoak dira, ziurrenik partaideen zerrenda osotik gehiengo dira. Kuriositate bat: gizonen sailkapen nagusian lehena eta azkena herrikideak izan ziren. Lezoarren sailkapen berezituan, berriz, Ander Iñarra garaile absolutua lehena izan zen gizonetan, eta bigarrenez jarraian Iratxe Etxegoien emakumeetan. Bigarrenak Leire Etxezurieta eta Raul Artola izan ziren, eta hirugarrenak Leire Amiano eta Joseba Etxegoien.
Beheko testu estekatuan klik eginda, lezoarren sailkapen osoa ikus daiteke, egindako denboraren arabera zerrendatuta. Honekin HITZAren asmoa ez da herritarren arteko pikea sortzea. Besterik gabe, lezoarrek dortsala jarrita ere lasterketari sekulako ekarpena egiten diotela aitortzeko modua da.
Lezo-Jaizkibel mendiko lasterketa 2024. Lezoarren sailkapena (PDF artxiboa jaitsiko da).
