Lezoko Martxoaren 8koak, elkarlanean eta kirol kutsuarekin
Herriko eragileek Martxoaren 8ari begirako egitaraua aurkeztu dute. Kirolarekin harremana duten ekitaldi dezente prestatu dituzte.
Kirolean ere ahalduntzerako espazioa irabazten ari dira emakumeak, ekinaren ekinez. Lezon horren adibide asko daude. Hartara, herriko eragileek Martxoaren 8ari begira antolatu dituzten ekitaldietatik dezente kirol kutsukoak izango dira, kirolean ere emakumeak espazioak irmo irabazten ari direlako.
Gaur eman dute Martxoaren 8ra begira herriko eragileek antolatu dituztenen berri. Martxoaren 2tik 9ra arteko epean gauzatuko dira ekitaldi horiek guztiak. Horien prestaketan, udalaren babesarekin, Lezoko Iruntzen Emakume Taldea, Gaxuxa Elkartea, Arkiru Pilota Kluba, Emakume Korrikalariak eta nordik walking-ekoak, Emaion Harri Tiraketa taldekoak, eta Korrika Batzordea aritu dira.
Honakoa da osatu duten egitaraua:
- Martxoak 2 (larunbata): 19:00etan, Gezala Auditoriumean, Mirari Martiarenaren eta Idoia Torregarairen ZtandaP bakarrizketa-antzerki saioa. Sarrera: 8 euro. Egin klik hemen sarrera erosteko.
- Martxoak 3 (igandea): Lilatoia egingo dute Donostian (10:25ean hasiko da). Hiriburura joateko Lezoko hitzordua 08:50an jarri dute, Bekoerrota kiroldegian.
- Martxoak 7 (osteguna): 19:00etan, Koldobike Gezala pilota txapelketaren finalerdiak Koldobike Gezala pilotalekuan.
- Martxoak 8 (ostirala): 19:00etan, Gurutze Santuaren plazatik hasita, herriko manifestazioa. Zapi morea eramateko eskatu dute. Saldise plazan bukatuko da, eta han ekitaldia egingo dute.
- Martxoak 9 (larunbata):
- 10:00etan, ibilketa nordikoan (nordic walking) dabiltzan emakumeek nahiz oinezkoek bost kilometroko ibilbideari ekingo diote. Ibilbide bera egingo dute emakume korrikalariek, baina 10:30ean abiatuta. Plazan hasiko dute bidea.
- 11:30ean, Emaion Harri Tiraketa taldearen erakustaldia probalekuan.
- 14:00etan, Ibaiondon, bertso bazkaria. Alaia Martin eta Ekhiñe Zapiain izango dira bertsolariak, eta Amaia Resendek emango dizkie gaiak. Txartelak jada salgai dira Txingurrin eta Tiñelun.
- 19:30ean, Koldobike Gezala pilota txapelketaren finala, Koldobike Gezala pilotalekuan.
