Oarsoaldea Suspertuz III programa garatu da 164 enpresatan
Programa horren baitan diagnostikoak egin dira industriaren eta zerbitzuen sektoreetan, trantsizio digitaleko, soziodemografikoko eta ekologiko energetikoko erronkei aurre egiteko laguntza estrategikoa emanez.
Gipuzkoako Foru Aldundiak, Ekonomia Sustapen, Turismo eta Landa Inguruneko departamentuaren bitartez, Oarsoaldea Suspertuz III programa finantzatu du, eskualdeko 164 enpresatan diagnostikoak eginez. “Aldaketa azkarren eta erronken erdian”, COVID-19aren pandemia eta Ukrainako krisia tarteko, enpresek “zentzuzko jarduera” erakutsi dutela adierazi du Oarsoaldea Garapen Agentziak.
Diagnostikoak industriaren eta zerbitzuen sektoreetan oinarritu dira, trantsizio digitaleko, soziodemografikoko eta ekologiko energetikoko erronkei aurre egiteko “laguntza estrategikoa” emanez. Egindako azterlanak programak eta politika publikoak bideratzeko joerak eskaintzen dituela nabarmendu du garapen agentziak, “enpresen erresilientzia indartuz”.
Eragin ekonomikoaren azken azterketan, “funtsezko” alderdiak ebaluatu direla jakinarazi dute; hala nola, salmentak, kostuak, irabaziak eta inbertsioak. Azterketa horrek egungo ingurune ekonomiko dinamikoan enpresek dituzten “kezken eta erronken” ikuspegi “argia” eman duela ziurtatu du Oarsoaldeak.
Honakoak dira Oarsoaldea Suspertuz III programan ateratako emaitza nagusiak:
Aztertutako sektoreak:
- Industria eta lotutako zerbitzuak (%59).
- Zerbitzuak, hiri ekonomia (%46).
- Merkataritza (%14).
- Ostalaritza (%9).
- Elikadura (%8).
- Eraikuntza (%8).
- Sortzailea (%7).
- Logistika (%6).
- Teknologia (%5).
- Itsas ekonomia (%1).
- Turismoa (%1).
Udalerrien araberako banaketa:
- Errenteria-Orereta: 70 enpresa (%42,68).
- Oiartzun: 44 enpresa (%26,83).
- Lezo: 35 enpresa (%21,34).
- Pasaia: 15 enpresa (%9,15).
Erronka eta kezka nagusiak:
- Talentua erakarri eta mantentzea (%37,19).
- Teknologia (%28,66).
- Berrikuntza (%15,85).
- Kostuak (%14,63).
- Marketina (%14,63).
- Salmentak (%14,02).
- Finantzak (%13,41).
- Energia (%10,97).
Prestakuntza beharrak:
- Anbidestreza eta hornidura (%100).
- Belaunaldi erreleboa (%71,43).
- Talentua mantendu eta erakartzea (%69,23).
- Marketina (%55,56).
- Teknologia (%52,78).
- Nazioartekotzea (%50).
- Salmentak (%47,06).
Aurten, enpresek kostuen hazkundearen ondoriozko erronkei ere aurre egin behar izan dietela gogorarazi du garapen agentziak, salmentak handitzeko eta gastuak kontrolatzeko estrategietara bideratuz, batez ere digitalizazioaren bidez. Epe laburreko erronkei heltzea lortu duten arren, talentuari “interes handiena” dagokiola zehaztu dute, batez ere talentu gazteari; eta, ondoren, teknologiari eta berrikuntzari. Hala ere, ekonomia zirkularra bultzatzeko “interesik eza” nabarmendu dela adierazi dute, enpresen jasangarritasunean “arrakala” nabarmen azalduz.
Etorkizunean jasangarritasuna sustatzeko proiektuen ardatza “enpresak erakargarri” bihurtzea izan behar dela esan dute, talentua enpresetara hurbiltzea lortu eta mantentzeko, ekonomia zirkularra sustatzeko eta digitalizazioarekin jarraitzeko.
Horrez gain, berrikuntza gisa, diagnostikoan hizkuntzen gaia landu dela jakinarazi dute, enpresen lehiakortasunerako “funtsezko” elementu gisa. Hizkuntzen alderdia sartzeak aukera eman die enpresei “hizkuntzek lehiakortasunean duten garrantziaz sentsibilizatzeko”.
Garapen agentziak adierazi du emaitzek nabarmendu dutela “prestakuntza” behar dela “kualifikazio urritasunei” aurre egiteko, “funtsezko” arloetan oinarrituta; hala nola, anbidestreza, talentua erakartzea eta teknologia. Enpresak alderdi horietan lanean ari direla jakinarazi dute, baina “baliabide gehiago” behar direla gaineratu dute, horiei “behar bezala” heltzeko.
