Udako oporrak programan izena emateko aukera, ostiraletik aurrera
Martxoaren 1etik 22ra arte, biak barne, ahalko da izena eman Txikiak, Handiak, Errenteabentura eta Kanpabenturan esleituko diren 826 plazetako bat eskuratzeko.
Aitor Zorzano Gazteria zinegotziak, Itziar Duarte Udako Oporrak programaren koordinatzaileak, eta Bea Martin Gazteria dinamizatzailea Udako oporrak programan izena emateko epea ostiralean, martxoak 1, zabalduko du udalak, eta martxoaren 22ra arte izango da horren barruko programetan esleituko dituen 826 plazetako bat eskuratzeko. Errenteria-Oreretan erroldatuta, edota erroldatuta egon gabe bertako ikastetxeetako batean ikasketak egiten dituzten haur eta gaztetxoek izango dute udako aisialdi hezitzailearen eskaintza osatzen duten jardueretan izena emateko aukera.
Izapide guztia webgune honetatik egitea aholkatu dute.
Aurrez aurreko izena emateko epea, berriz, hilaren 11tik 22ra, biak barne, Zu! zerbitzuan egin dezakete. Horretarako, webgunearen bidez beharrezko inprimakia deskargatu daiteke eta eskatzen den dokumentazioarekin batera aurkeztu. Aurrez aurre izena emateko, ezinbestekoa da hilaren 7tik aurrera hitzordua hartzea 943 44 96 00 edo 010 telefono zenbakietan.
Ikasturtean bezala, udan ere, aisialdi hezitzailearen aldeko apustua egin duela udalak azaldu dute aurkezpenean, Aitor Zorzano Gazteria zinegotziak, Itziar Duarte Udako Oporrak programaren koordinatzaileak, eta Bea Martin Gazteria dinamizatzaileak, “helburu nagusia balioetan eta eskubideetan heztea da, parekidetasuna, parte hartzea, inklusioa edo euskara sustatuta”.
826 plaza orotara
Eskaintzaren barruan 826 plaza daude banatuta programetan. 2018-2020 jaiotako haurrei zuzendutako Txikiak programan eta 2014-2017 jaiotakoentzako Handiak programan izena eman nahi dutenek bi txandetako batean eman dezakete izena, ekainaren 24tik uztailaren 5era, edo uztailaren 8tik 19ra.
Hiru elkargune izango dira, halaber: Agustinak, Beraun, eta Erdigunean. Adin tarte horiei begira 680 plaza eskainiko ditu udalak bi txandetan. Txikiak programan parte hartzeko 43,20 euro ordaindu beharko dituzte, eta Handiak programan berriz, 54 euro.
Errenteabentura programak ez du hutsik egingo aurten ere. 2011-2013 urteen artean jaiotako haurrei begirakoa da eskaintza, eta goiz eta arratsaldez, zein egun osoz hainbat jarduera izango dituzte parte hartzaileek. Txanda bakarra du programak uztailaren 1etik 12ra eta 96 pertsonentzako lekua du. Prezioa, 64,60 eurokoa da.
Azken programa, 2008-2010 urteen artean jaiotako haurrei begirakoa da: Kanpabentura. Aste eta erdi igaroko dute Beireko (Nafarroa) aterpetxean parte hartzaileek uztailaren 8tik 17ra. Jardueraren prezioa 215,80 eurokoa da eta 50 lagunentzako tokia izango da.
Behar zehatzak dituzten parte hartzaileei laguntzeko langile kualifikatuak izango dira.
Kanpabenturaren kasuan, lehentasuna izango dute aurretik programa horretan parte hartu ez duten haurrek. Hala ere, izen-emate kopuruak plazak gainditzen baditu, zozketa egingo da, aurretik aipatutako lehentasun hori kontuan hartuko delarik.
Gaitasun ekonomikoaren araberako tarifak
Programetan izena emateko garaian ez da ordaindu beharko, izan ere, erabiltzaileen gaitasun ekonomikoaren araberako tarifak egokituko ditu udalak. Zenbateko hori kalkulatzeko izena emateko orria betetzerakoan egin beharko da eskaera. Informazio guztia webgune honetan kontsulta daiteke, eta zalantzak argitzeko posta elektronikora mezua bidali edo 943 44 96 06 telefono zenbakira deitu daiteke.
