Sahara erdigunean jarriko du Orereta Palestinarekin Herri dinamikak
'Sahara herri bat erresistentzian' liburua aurkeztuko du Kristina Berasain Tristan kazetari eta idazleak asteartean—martxoak 5— Reina aretoan.
Kristina Berasaian Tristan kazetari eta idazlea. Sahara mahai gainean jarriko du Orereta Palestinarekin Herri dinamikak. Palestinaren inguruko hitzaldiak eta iniziatibak antolatu ohi ditu dinamikak, izenak erakusten duen moduan, baina oraingoan Saharari egingo dio keinu. Taldekide bat Saharakoa da. Hori baliatuta eta aintzat hartuta sahararrek hamarkada luzetan bizi duten egoera latza, hitzaldia antolatzea erabaki zuten. Gogora ekarri du halaber taldeak, 1976ko otsailaren 27an aldarrikatu zutela RASD Saharako Errepublika Arabiar Demokratikoaren independentzia, Mendebaldeko Saharako ipar ekialdeko Bir Lehlu herrian.
Marokoren okupazioak munduko harresi luzeenaren bi aldeetan banatuta bizitzera derrigortu ditu sahararrak.
Sahara herri bat erresistentzian liburu aurkezpena antolatu du herri dinamikak. Asteartean izango da, martxoaren 5ean, 19:00etan Reina aretoan. Kristina Berasain Tristan kazetari eta liburuaren egileak egingo du aurkezpena eta solasaldia. Elkar, Jakin eta Berriak Aleka bildumaren barruan argitaratu dute Berasainen liburua iazko azaroan, “ahanzturara kondenatutako herri horren borroka kontatu du, bertatik bertara, sahararren kontakizunak eta lekukotzak, historiaren pasarteekin tartekatuz. Lurralde okupatuetako eta kanpalekuetako sahararrak gerraz, errepresioaz, heriotzaz eta erbesteaz mintzo dira kazetari eta idazlearen liburuan, baina okupazioa hasi zenetik bost hamarkada luze bete direnean, ez dute independentzia erdietsi eta jaioterrira itzultzeko itxaropena galdu. Sahararra bere nortasunari, duintasunari eta erresistentziari eusten dion herria da”.
Ahaztutako gatazketan eta giza eskubideetan espezializatutako kazetaria da Kristina Berasain (Lizarra, 1973). Berria egunkariaren mundua saila zuzendu du urte luzez, Mendebaldeko Saharara 2005ean intifadaren berri ematera joan zenean kateatu zen herri horrekin. Mezuak Mendebaldeko Saharatik dokumentalaren egileak, lehen liburua du Sahararen gainean idatzitakoa, eta Maria de Maeztu Literatur Lehiaketa irabazi zuen Tximeleta bat naiz lanarekin 2017an eta sari bera Arrastoak, lorratzak, uharak lanarekin 2022an. Aurten berriz, prentsa alorreko Argia saria jaso du, Sahara, herri bat erresistentzian liburuarengatik.
Berria egunkariak Argia Saria jasotakoan egindako elkarrizketa irakur daiteke hemen klik eginda.
