Sei emanaldirekin ondutako egitaraua Madalenaren Ermitan
Bihar izango da emanaldi horien artetik lehena; Herri Arte Eskolak emanaldia egingo du Madalenaren ermitan. 19:00etan.
Atzoko agerraldiaren aurkezpeneko irudia. Argazkia: Iker Castaño Emanaldi sortak musika gerturatuko die herritarrei Madalenaren ermitan. Atzo aurkeztu zituen emanaldi horiek guztiak Maria Magdalenaren Lagunak Kultur Elkarteak. Bihar izango da antolatutakoen artetik lehen hitozrdua, Herri Arte eskolak 19:00etan hasita egingo duen emanaldiarekin. Ostiralean, berriz, abesbatzen txanda helduko da, eta zehazki, Telleri eta Urrugne abesbatzak ariko dira agertoki berean, 20:00etan hasita.
Lekukoa, beste abesbatza batek hartuko du larunbatean, Orioko Salatxo abesbatzak. 20:00etan hasiko du azken horrek emanaldia. 35 ahots mistoz osatutako taldeak musika korala eta euskal musika eskainiko ditu bereziki Igor Arroyoren zuzndaritzapean. 30 urteko ibilbidea dute oriotarrek.
Niessen Elkarteak antolatuta, Easo abesbatzak emanaldia eskainiko du martxoaren 10ean. Solidarioa izango da Errenteria-Oreretako elkarteak antolatu duen emanaldi hori, zehazki Alzheimerra eta parkinsonaren gaineko sentsibilizazioa bilatuko dute eta bildutako diru guztia gaitz horiek dituztenekin eta haien senideekin lanean ari den Afagi Gipuzkoako elkartearentzat izango da. Emanaldiaren aurretik, hitzaldia egingo du elkarte horrek egiten duen lana azaltzeko.
Martxoaren 16an Ilunbe Akordeoi Orkestra igoko da agertokira Madalenaren ermitan, eta haien emanaldiak ez duela inor epel utziko agindu dute, “akordeoi klasikoa da eta jendeak sorpresa hartzen du emanaldietan”, azaldu dute. Errenteria-Oreretako hitzordurako errepertorio ezagunaren alde egin dutela azaldu dute: “soinu bandak aukeratu ditugu eta Queenen Bohemian Rhapsody besteak beste”. Duela 40 urte sortu zuten orkestra akordeoi jotzaile hainbaten ekimenez, sari ugari jasotakoa da taldea, eta 16 kide ari dira egun bertan jotzen. Joxe Juan Zubillagaren zuzendaritzapean ariko dira.
Martxoaren 22an, berriz, 19:30ean herri Arte Eskolako orkestrak egingo du emanaldia.
