Trapujale taldeak lezoar gehiago nahi ditu
Inauteriak pasata, bi ohar helarazi dituzte: datorren urterako Trapujale arropak prestatzen joatea eta taldean parte hartzea, ideia berriak eta laguntzaile gehiago izateko.
Inauteriak pasata, haien inguruko balorazioa egin du Lezoko Trapujale taldeak. Lehenik eta behin, esker hitzak izan dituzte Lezoko herriarentzako, antolakuntza lanetan izan diren pertsonentzako eta ekitaldietan parte hartu duten horientzako. Eguraldia lagun izan ez arren, animazioak Lezoko kaleetan presentzia izan zuelako pozik dira Trapujale taldekoak.
Horrez gain, bi ohar helarazi dizkiete lezoarrei. Alde batetik, herritarrei gogorarazi diete urte oso bat dutela aurretik Trapujale arropak prestatzeko eta datorren urtean jende gehiago Trapujalez jantzita joateko. Bestetik, lezoarrei Trapujale taldean parte hartzeko deia luzatu diete: “Datorren urtean antzezleak, ideia berriak eta laguntzaile gehiago behar ditugu. Animatu!”.
Trapujale taldeak 37 urte daramatza Lezoko inauterietan eragiten, eta beste horrenbesteren bila doazela argi esan dute.
