ZtandaP emankizuna eta bertso afaria Korrika Kulturalaren barruan
Mirari Martiarena eta Idoia Torregaraik saioa egingo dute bihar; bertso afaria, berriz, larunbatean helduko da.
Mirari Martiarena eta Idoia Torregarai. 23 Korrikarako beroketa lanak egiten hasi dira, eta nekatu gabe egiteko aukera eskainiko du, gainera, Xenpelar AEK-k. Bihar, Mirari Martiarena eta Idoia Torregaraik Ztandap emankizunarekin gozatu eta barre egiteko aukera emango diete Xenpelar Etxera bertaratzen direnei. 19:00etan da emanaldia, eta sarrerak 5 euroan dira salgai, Xenpelar AEK Euskaltegian eta Sindikato tabernan.
Hilekoa, menopausia, masturbazioa, ligatzeko teknikak eta sexua dituzte hizpide, besteak beste. Kritika eginez, deseraikiz eta barre eginez bazterrak zirikatuko dituzte Martiarenak eta Torregaraik. Oraingoan ere, generoa hartu dute umore gai, eta eguneroko kontuak lehertzen saiatuko dira betaurreko moreak jantzita.
Asteburuko bigarren hitzordua Korrika Kulturalaren barruan, larunbatean izango da. Ordurako, bertso afaria antolatu dute. Aissa Intxausti, Sustrai Colina eta Aitor Sarriegi ariko dira bertsotan 21:00etan hasita Niessen elkartean. Txartelak Xenpelar AEK Euskaltegian eta Arkaitza tabernan daude salgai, 20 euroan.
