Ernai: "Orain lanean jarraitzea dagokigu"
Gazteon Eskutik ekimenaren gaineko balorazio "oso positiboa" egin du Ernai gazte antolakundeak, eta eskerrak eman dizkie lanean aritu diren milaka txandalariei eta Lezoko herriari: "Zuek gabe ez litzateke posible izango".
Larunbateko ekitaldi politikoko irudi bat. Argazkia: Ernai Oso arrakastatsua izan da, ez da zalantzarik. Ernai gazte antolakundeak 3.000 gazte independentista bildu zituen Gazteon Eskutik ekimenaren bueltan Lezon joan den asteburuan. Eguraldia ez zuten lagun izan, baina horri ere aurre eginda erdigunea hartu eta jendartzea eraldatzeko prest direla ageri-agerian utzi zuten.
Topagunearen azken egunean balorazioa helarazi zuen Ernaik. Emaitzarekin ase, eta pozik azaldu da gazte antolakundea: “Milaka gazte independentista elkartu gara hiru egunez Lezon, Gazteon Eskutik ekimenean. Hiru egun ikaragarri izan dira, hainbat hitzaldi, ikuskizun, tailer, kontzertu eta erakusketa izan ditugu. Herriko plaza zein kaleak bete eta auzolanaz blaitu dugu Lezoko txoko oro”. Eskerrak ere eman ditu, egun horietan bizitakoa posible egin duten milaka txandalariei batetik, eta Lezoko herriari, bestetik, “zuek gabe ez litzateke posible izango”.
Balorazioa positiboa, beraz, antolakuntzak, eta sinistuta gainera Lezon hiru egun horietan ikusitakoa “egindako lanaren fruitua” dela: “Urtez urte Ernairen udaberriko ekimenak gero eta emankorragoak eta gozagarriagoak dira gazte guztientzat”.
Mezu argi bat ere, balorazio horren barruan, egitekoa ez dela hor amaitu, “orain lanean jarraitzea dagokigu. Gazte udaberria hedatu behar dugu”. Horretarako, gazteek eztabaidaren erdigune politikoa hartu beharra ezinbestekoa jo du, “gure proposamenak mahai gaineratu eta aldaketen aroa martxan jartzea posible dela erakutsiko dugu. Gazteok bizitza duinak lortzeko ahalmena eta erabakimena behar dugu eta horretara bidean herri eta auzoetako bazter guztiak hartuko ditugu, gazte fronte bat irekitzera goaz”.
Hori guztia Euskal Herrian egingo dutela gaineratu du gazte antolakundeak, “independentistak garelako, eta horretarako aukera dagoelako. Amesten dugun Euskal Herri aske, sozialista eta feministatik inoiz baino gertuago gauden honetan, prozesu independentista loratzea ere badagokigu”.
Kepa Etxeberria oreretarraren murala Lezon
Euskal Irria murala
Bestalde, gazte independentisten topagunearen barruan, Kepa Etxebarria oreretarrak egindako murala inauguratu zuten larunbat goizean. Porrotx pailazoarekin ekitaldia izan zen goizean, txikienei begirakoa, eta testuinguru horretan egindako lanaren berri eman zuen Etxebarriak. Pirritx, Porrotx, eta Mari Motots irudikatu ditu Kale Nagusiko horma batean artista oreretarrak.
Horma irudian irudikatu duenaz mintzo zen, eta bildutakoen txaloak eta esker ona ere jaso zuen Etxebarriak ondoko bideoan ikus daitekeen bezala. Bideo hori, Etxebarriak berak helarazi du HITZAra.
Gazteon Eskutik 2024 • Lezo
— Ernai (@ernaigazte) April 1, 2024
Gora Euskal Gazteria!#LoratuDa pic.twitter.com/RZpbWWQqUt
