Jaizkibelen koloreak, doinuak eta basoak, hurbiletik
Mendiko basoen egoera zein den ezagutarazteko txangoa antolatu du Amezti Baso Biziak Jaizkibel taldeak. Xehetasunak emateko Aitziber Sarobe Egiguren biologoa gonbidatu dute taldekideek.
Xoxolurreko hariztia ere bisitatuko dute bihar txangoarekin bat egingo dutenek. Jaizkibelen koloreak, doinuak eta usaina bereganatzeko aukera izango dute bihar (larunbata) lezoarrek eta hala nahi duten denek. Mendira irteera antolatu du Amezti Baso Biziak Jaizkibel taldeak, bi-hiru ordukoa. 09:30ean gelditu dira Gurutze Santuaren plazan, eta Aitziber Sarobe Egiguren Natur Elkarteko eta Naturkoneko biologoa izango dute bidaide, azalpenak ematen. Zuhaitzen landaketa ere egingo dute.
Ameztiren asmo nagusia da Jaizkibelgo basoaren egoera zein den azaldu eta aztertzea, eta basoek zein onura ematen dituzten nabarmentzea, hainbat xehetasun ematen: baso osasuntsuek zein ezaugarri dauzkaten, egur hilak basoan zein funtzio betetzen dituen, zuhaitzek iturrietan ur garbia izateko zer lan egiten duten, zuhaitzek mendia eusteko duten funtzioa, eta beste gai askoren gaineko xehetasunak jasoko dituzte irteerarekin bat egiten dutenek.
Horretarako mendian gelditzen den ameztiaren azken arrastoetara iritsiko dira martxarekin bat egingo dutenak, eta Iparragirre eremuan berreskuratzen hasi diren ameztiaren eredua ere ezagutzeko aukera izango dute. «Hori eredu hartuta, Jaizkibelgo hainbat puntutan geldialdiak egingo ditugu, eta horietan tokian-tokiko egoera zein den aztertuko dugu», zehaztu dute Ameztitik. Udalak bertako basoa berreskuratzeko egin dituen lanen berri ere izango dute txangolariek.
Adibidez, usteltzen ari diren pinu sailak ezagutzeko parada izango dute irteeran parte hartuko dutenek, Ameztikoek zehaztu dutenez. «Egur berri asko ari da sortzen, eta adibidez, okil beltzen komunitatea asko zabaltzen ari da horregatik. Eukalipto landaketak ere murrizten ari dira, eta beste hainbat espezietako zuhaitzak eraztundu dituzte, ahuldu daitezen, eta Jaizkibelen bertako basoak eta espezieek gain har dezaten. Horren guztiaren berri emango du Aitziber Sarobek».
Azalpenak, zuzenean
Naturkoneko kide izateaz gain, ibilbide luzeko esperientzia du Sarobek basoen berreskuratze lanetan, eta biodibertsitatearen defentsaren alorrean. Era zuzen eta garbian emango ditu azalpenak bihar, eta Jaizkibelen ameztia berreskuratzeko onuren berri emango du, baita landaketek eta basoek dituzten aldeak azaldu ere.
