Olatzarren gazteentzako etxebizitzak egingo dituztelako, Lezoko EAJ baikor
Eremu horretan babes ofizialeko 33 etxebizitza, eta beste 24 tasatu eraikitzen hasiko dira. Egitasmoa aurreko legealdian "sortu, onartu eta abiatu" zela esan du EAJk.
Lezoko EAJk oso baikor baloratu du Olatzar eremuan babes ofizialeko 33 etxebizitza, eta beste 24 tasatu egiteko egitasmoa. Joan den osteguneko udalbatzarrean onartu zituzten herriko zinegotziek etxebizitza horiek esleitzeko baldintzak, sustatzaileak Eusko Jaurlaritzako Etxebizitza Sailaren behin-behineko kalifikazioa lortu ondoren. “Egitasmo hori aurreko agintaldian sortu, onartu eta abian jarri zen. Hori dela eta, Lezoko EAJtik pozik hartu dugu aurreko udal gobernuak bultzatutako etxebizitza publikoak sustatzeko politikak udalerrian garatzen jarraitzea, EAJk planifikatu bezala”, esan dute herriko jeltzaleek.
Lezoko EAJren arabera, Olatzarreko etxebizitza egitasmoarekin “gure herrian garapen orekatuaren aldeko apustua” egingo da, “eta Lezoko gazte askok euren bizitza proiektuari ekiteko aukera izango dute”. Bestalde, eremu horretan udalak duen partzelan 32 etxebizitza publiko egingo direla zehaztu du EAJk, “horiek sustatzeko konpromisoa hartu dugu”.
Olatzarreko babespeko 57 etxebizitza horiez gain, Altzateko Lezoren eremuan beste babes ofizialeko hamasei, eta Aralar kalean 52 zuzkidura-etxebizitza egingo direla oroitarazi dute Lezoko EAJko kideek.
