Santa Klarako auzotarrek "laster arte" esan diote Toki Ederri
Elikagai naturalen dendak ateak itxiko ditu mende laurdenaren ondoren. Auzokideek "agur" esan diote dendari, omenalditxoarekin.
Pandemiak gauza txarrak ekarri zituen duela lau urte, baina txarrenari onena atera behar zaionez, komunitate-izpiritua gorpuztu zen hainbat txokotan. Toki askotan iragankorra izan zen komunitatearen lotura hori, baina Errenteria-Oreretako Santa Klara kalean geratu zen.
Gaur auzoari —bertakoek horrela deitu izan diote beti— bizitza ematen zion establezimenduetako bati “agur” esan diote. Elikagai naturalak saltzen dituen Toki Eder dendak ateak itxiko ditu. Eskerrak emateko ekitaldia antolatu dute eguerdian, dendaren aurrean. Kalekoak elkartu dira denda kudeatu duten ama-alabei mende laurden honetan egindako ekarpena aitortzera. Gogorarazi dutenez, Santa Klaran pixkanaka komertzioak ixten ari dira.
“Mila esker beti hain ongi eta irribarre batekin artatzeagatik”, esan die, auzotarren izenean, Xabier Vesgak, Adio ene maitia jo aurretik. Adio esan beharrean, “laster arte” izango dela esan die Toki Ederrekoei.
Zorionak zuri ere kantatu diete denen artean. Orain arte Toki Eder eraman dutenek argi utzi nahi izan dute denda txikien balioa sortzen duten harremanetan datzala. Auzotarrak “jende zoragarria” eta “maitagarria” direla esan dute, eta “betirako” eramango dituztela bihotzean. Hitzak dendaren izena bezain ederrak izan dira.
