Traineruen aurkezpen "erraldoia" iragarri du Hibaikak
Prest ditu eskifaiak denboraldia hasteko, sua uretan pizteko, eta urtero moduan, aurten ere, seniorren emakume eta gizonen traineruen aurkezpena egingo du.
Hibaikaren zaleak iazko Kontxako estropadan errenteriarrak animatzen. Handia da egiten duten lana, eta lan horren tamainako traineruen aurkezpena egin nahi du Hibaika Arraun Elkarteak: Txikitasunetik, erraldoi. Sare sozialen bidez zabaltzen ari da aurkezpen horren berri arraun elkartea, baita herriko bazter gehien-gehienetan jarritako kartelen bidez.
Prest ditu eskifaiak denboraldia hasteko, sua uretan pizteko, eta urtero moduan, aurten ere, seniorren emakume eta gizonen traineruen aurkezpena egingo du. Datorren ostegunean —hilaren 13an— izango da aurkezpena Gamon Zumardian, 19:30ean.
Hibaika Arraun Elkarteak herritar guztiak deitu ditu bi traineruen aurkezpen ekitaldira gerturatzera, «gure arraunlariei babesa erakustera». Izan ere, ezinbestekoa jo dituzte herritarren animoak eta hauspoa. Argazki erakusketa, traineruen aurkezpena eta sorpresa “erraldoia” iragarri ditu elkarteak.
Gazteei deia arraunera gerturatzeko
Traineruen aurkezpena ez da egiteko bakarra. Harrobia sendotzeko lanean ere ari da, etengabe, Hibaika, eta deia luzatu die herriko zein inguruetako gazteei arraun elkartera gerturatu eta arrauna lehen eskutik ezagutu dezaten. Interesdunek, Hibaikaren egoitzara —Iztieta-Ondartxo auzoa—jo behar dute astelehen, asteazken eta ostiraletan 17:00etatik aurrera.
