ABB Niessengo langileek protestak egingo dituzte datorren astean
Hitzarmen berria adosteko negoziazioan blokeoa eman dela-eta erabaki du langileen batzarrak mobilizazioak egiten hastea.
Mobilizazioak iragarri dituzte ABB Niessen enpresako langileek datorren asterako. LAB, ELA eta UGT sindikatuek osatutako enpresa batzordeak jakinarazi du enpresako zuzendaritzarekin hitzarmen berria negoziatzen ari dela.
Langileek mahai gainean jarritako gai nagusiak, ondokoak: soldatak, zaintza egoeretarako lizentziak, lanaldi murrizketa, 50 urtetik gorako langileen gaueko txanda kentzea, eta aldi baterako lan kontratuak erregulatzea. Hitzarmen berria lotzeko lanketan bi hilabete daramate, baina”aurrerapenik” ez dela izan zuzendaritzaren aldetik jakinarazi du enpresa batzordeak, “blokeo egoeran gaude”.
Hori horrela, mobilizaziorako bide hartzea adostu dute langileek batzarrean, eta lehen protestak datorren astean egingo dituzte, hilaren 11, 12 eta 13an. Zehazki, greba partzialak egingo dituzte hiru egun horietan, txanda bakoitzean ordubeteko lanuztea eginda. Langileek batzarra eta bozketa bidez atzo adostutako mobilizazio sortaren hasiera izango dira greba partzial horiek.
