Eraginkortasuna eta aurrezpena gako
Errenteriako Udalak 865.000 euro bideratuko ditu eraginkortasun energetikorako inbertsioak egitera, iazko kopurua hirukoiztuta.
Otaegi eta Martin gaurko agerraldian. Haien atzean, udal langile bat ikus daiteke argiterian aldaketa egiteko lanean. 864.911 euro bideratuko ditu udalak aurten eraginkortasun energetikorako inbertsioak egitera, iaz materia berera bideratutako diru zatia hirukoiztuta. Agerraldia egin dute horren berri emateko gaur goizean Aizpea Otaegi alkateak eta Yolanda Martin Ingurumen zinegotziak. Errenteriako Klima eta Energiaren tokiko plana dela iparrorratza azaldu du Otaegik, “gaur aurkeztu dugun inbertsio hau azkenean plan horretara bildutako helburuak betetzera bideratuta dago, eta horretarako inbertsioak egiten ari gara udal jabetzako eraikinetan baita argiteria publikoan ere. Inbertsioa energia berriztagarrietan instalazio berriak egin eta komunitate energetikoa sustatzearekin batera, kontsumoa murrizteko neurriak hartzen jarraitzen du udalak, klima aldaketari aurre egin eta burujabetza energetikoan irabazteko”.
Datuak Otaegik gaurko agerraldian, eskakizunen ingurukoak. Jasangarritasun Energetikoari buruzko legearen arabera %35eko energia aurrezpena lortu behar du, gutxienez, Errenteriako Udalak 2030 urterako, 2007ko kontsumo datuak erreferentziatzat hartuta: “Dagoneko %29ko aurrezpena lortu du eta tokiko planean legeak ezartzen duena baino anbizio handiagoko helburua jarri diogu gure buruari, %39ko aurrezpena lortzea 20230 urterako”. Bide onetik doa udala, beraz, datuek hala erakusten dute.
Energiaren azken kontsumoaren kasuan ere bikain ari da lanak egiten. Arlo horretan 2030 urterako %12 aurreztea du ezarrita helburu gisa Energia Trantsizioaren eta Klima Aldaketaren Legeak 2021eko datuekin alderatuta: “Ordutik %21eko aurrezpena lortu du dagoeneko udalak”. Hori lortzeko hainbat neurri hartu dituela udalak energia aurrezpenaren arloan eta eraginkortasun energetikoan irabazteko inbertsio garrantzitsuak gauzatu dituela azaldu du alkateak, “zehazki, udal eraikin ezberdinetan argiteria aldatzen ari gara LED luminariekin ordezkatuz”. Horretan ari dira une honetan Goialde haur eskolan udaletxean, Hiri Mantenuan, Udaltzaingoan, Koldo Mitxelena ikastetxearen Olibet eraikinean, Merkatuzarren, Xenpelar Etxean, eta Pio Baroja eraikinetan.
Kaleko argiztapenean ere ari dira kontsumo baxuagoko sistemak ezartzen gaurtik hasita, Galizia biribilgune inguruan, Galtzaraborda kiroldegiaren inguruan, Tulle kalean eta Maria de Lezo kaleetan. Datozen asteetan egingo dituzte ordezkatze lan horiek aipatutako eremu horietan. Nafarroa etorbidean agerraldia egiteko unean ari ziren eremu horretako kaleko argiterian aldaketa egiten udal langileak.
Urtean zehar, gainera, 479.000 euroko lizitazioa abiatuko du udalak argiteria publikoko koadro gehiago ordezkatzeko, tartean, Beraungo estadioko argiteria. Lanak aurten esleitu eta 2025ean gauzatuko direla aurreikusi du Otaegik.
Egindako bidean jauzi bat
Aurreko urteetan egindako bidean jauzi bat suposatzen du aurtengoak Otaegiren hitzetan, “lehen esan moduan hirukoiztu egin delako iazkoarekin alderatuta aurten egingo dugun inbertsioa”. Horrekin batera, beste arlo bati azpimarra jarri dio Otaegik: Udalarentzat iparrorratza den Errenteriako Klimaren eta Energia Iraunkorraren aldeko 2020-2030 Ekintza Plana herriko eragile ezberdinekin lankidetzan osatu zela, “bertan jasota daude 2030era arte udalak energia arloan hartutako konpromisoak”.
